Раҳмонберди девор ёнидаги озгина бўш жойда қоп ичида картошка ҳам етиштирмоқда.

Тадбиркорликка қизиқишини айтган 18 ёшли Раҳмонберди асосан кўчатчилик билан шуғулланади. Эрта баҳорга помидор, бодринг ва карам кўчатларини чиқариб, 1,5 миллион сўм фойда кўрибди.

«Иссиқхонани ҳам ўзим тол ёғочларидан ясаганман. Ичига помидор ва бодринг экиб, эртаки ҳосил етиштирдим. Натижада кўчатлар ва тепасига ёпилган плёнка харажатларидан ташқари, 1,5 млн сўмдан ортиқ фойда олдим.

Томорқада бўш жойнинг ўзи йўқ. Девор тагида озгина ер бор эди. Ўша жойни текислаб, қопда 100 қоп ичида картошка етиштиришга уриндим. Бу услуб жуда оз жойни эгаллар экан. Картошка экилган қоп ичига тупроқ, маҳаллий ўғит ва ёғоч қипиғи солинган. Чўмичлаб сув қўйиб, парваришлаяпман.

Шу услубда картошка етиштирган деҳқонларнинг айтишича, битта қопда 15 килограммгача картошка ҳосилини етиштириш мумкин. Агар мен 100 қопнинг ҳар биридан 8 килограммдан картошка олсам, худо хоҳласа, 800 килограмм ҳосил бўлади. Бозорда бир кг картошка нархи 5 минг сўм, бу эса қўшимча 4 миллион сўм даромаддир», дейди 18 ёшли тадбиркор йигит.

Бизни ёш Раҳмонбердининг шижоати, янгиликка бўлган интилиши қувонтирди. Келгусида етук тадбиркор бўлиб, эл-юртга кўп фойдаси тегишини тилаб қоламиз.

Элмурод Эрматов,
Аҳрорбек Ёқубжонов