Qonun loyihasida MJtKni “59-2-modda. Retseptlar yozish bo‘yicha qonun hujjatlarida belgilangan talablarni buzish” moddasi bilan to‘ldirish ko‘zda tutilmoqda.

Unga asosan, tibbiyot xodimlari tomonidan dori vositalariga (bundan giyohvandlik vositalari, psixotrop moddalar va prekursorlar ro‘yxatiga kiritilgan, shuningdek, tarkibida kuchli ta'sir qiluvchi moddalar ro‘yxatiga kiritilgan moddalar mavjud dori vositalari mustasno) retseptlar yozish bo‘yicha qonun hujjatlarida belgilangan talablarni buzganlik yoki retseptlarni soxtalashtirganlik uchun –

• BHMning 5 baravaridan 10 baravarigacha miqdorda jarima belgilash taklif etilgan.

Xuddi shunday huquqbuzarlik ma'muriy jazo qo‘llanilganidan keyin bir yil davomida takroran sodir etilgan bo‘lsa, –

• BHMning 10 baravaridan 15 baravarigacha miqdorda jarima solinishi mumkin.

Bundan tashqari, Jinoyat kodeksini “228-2-modda. Retseptlar yozish bo‘yicha qonun hujjatlarida belgilangan talablarni buzish” moddasi bilan to‘ldirish ko‘zda tutilmoqda.

Unga ko‘ra, tibbiyot xodimlari va boshqa shaxslar tomonidan giyohvandlik vositalari, psixotrop moddalar va prekursorlar ro‘yxatiga kiritilgan, shuningdek, tarkibida kuchli ta'sir qiluvchi moddalar ro‘yxatiga kiritilgan alohida dori vositalarni olish huquqini beruvchi retseptlarni yoki boshqa hujjatlarni soxtalashtirishganlik uchun –

• BHMning 25 baravaridan 50 baravarigacha miqdorda jarima yoki 150 soatgacha majburiy jamoat ishlari bilan yoki 6 oygacha axloq tuzatish ishlari jazosini belgilash taklif etilgan.

Bildirilishicha, qonun loyihasining qabul qilinishi shifokor retsepti bo‘yicha beriladigan giyohvandlik vositalari, psixotrop moddalar va prekursorlar, kuchli ta'sir qiluvchi moddalar ro‘yxatiga kiritilgan dori vositalariga retseptlar yozish bo‘yicha qonun hujjatlarida belgilangan talablarning buzilish holatlariga barham berish imkonini beradi.

Shuningdek, dori vositalari realizatsiyasini oshirish maqsadida zarur bo‘lmagan dori vositalarini yozib berish amaliyotiga barham beradi, aholining sog‘lig‘ini saqlashni ta'minlash, aholining shifokor ko‘rsatmasisiz davolanishi va dori vositalarining nojo‘ya ta'sirlarini oldini olish, shuningdek barkamol avlodni tarbiyalash uchun qo‘shimcha imkoniyatlar va shart-sharoitlar yaratishga zamin yaratadi.

Qayd etilishicha, xalqaro tajribani o‘rganish natijalari MDH davlatlaridan Rossiya, Gruziya, Belarus, Ukraina, Moldova va Qozog‘iston kabi davlatlarda dori vositalarini olish huquqini beruvchi retseptlarni yoki boshqa hujjatlarni soxtalashtirganlik uchun javobgarlik mavjudligini ko‘rsatmoqda.

Ushbu davlatlarda giyohvandlik vositalari, psixotrop moddalar va prekursorlar ro‘yxatiga kiritilgan, dori vositalar faqat retsept orqali belgilangan tartibda realizatsiya qilinishi belgilangan.