Қонун лойиҳасида МЖтКни “59-2-модда. Рецептлар ёзиш бўйича қонун ҳужжатларида белгиланган талабларни бузиш” моддаси билан тўлдириш кўзда тутилмоқда.

Унга асосан, тиббиёт ходимлари томонидан дори воситаларига (бундан гиёҳвандлик воситалари, психотроп моддалар ва прекурсорлар рўйхатига киритилган, шунингдек, таркибида кучли таъсир қилувчи моддалар рўйхатига киритилган моддалар мавжуд дори воситалари мустасно) рецептлар ёзиш бўйича қонун ҳужжатларида белгиланган талабларни бузганлик ёки рецептларни сохталаштирганлик учун –

• БҲМнинг 5 бараваридан 10 бараваригача миқдорда жарима белгилаш таклиф этилган.

Худди шундай ҳуқуқбузарлик маъмурий жазо қўлланилганидан кейин бир йил давомида такроран содир этилган бўлса, –

• БҲМнинг 10 бараваридан 15 бараваригача миқдорда жарима солиниши мумкин.

Бундан ташқари, Жиноят кодексини “228-2-модда. Рецептлар ёзиш бўйича қонун ҳужжатларида белгиланган талабларни бузиш” моддаси билан тўлдириш кўзда тутилмоқда.

Унга кўра, тиббиёт ходимлари ва бошқа шахслар томонидан гиёҳвандлик воситалари, психотроп моддалар ва прекурсорлар рўйхатига киритилган, шунингдек, таркибида кучли таъсир қилувчи моддалар рўйхатига киритилган алоҳида дори воситаларни олиш ҳуқуқини берувчи рецептларни ёки бошқа ҳужжатларни сохталаштиришганлик учун –

• БҲМнинг 25 бараваридан 50 бараваригача миқдорда жарима ёки 150 соатгача мажбурий жамоат ишлари билан ёки 6 ойгача ахлоқ тузатиш ишлари жазосини белгилаш таклиф этилган.

Билдирилишича, қонун лойиҳасининг қабул қилиниши шифокор рецепти бўйича бериладиган гиёҳвандлик воситалари, психотроп моддалар ва прекурсорлар, кучли таъсир қилувчи моддалар рўйхатига киритилган дори воситаларига рецептлар ёзиш бўйича қонун ҳужжатларида белгиланган талабларнинг бузилиш ҳолатларига барҳам бериш имконини беради.

Шунингдек, дори воситалари реализациясини ошириш мақсадида зарур бўлмаган дори воситаларини ёзиб бериш амалиётига барҳам беради, аҳолининг соғлиғини сақлашни таъминлаш, аҳолининг шифокор кўрсатмасисиз даволаниши ва дори воситаларининг ножўя таъсирларини олдини олиш, шунингдек баркамол авлодни тарбиялаш учун қўшимча имкониятлар ва шарт-шароитлар яратишга замин яратади.

Қайд этилишича, халқаро тажрибани ўрганиш натижалари МДҲ давлатларидан Россия, Грузия, Беларусь, Украина, Молдова ва Қозоғистон каби давлатларда дори воситаларини олиш ҳуқуқини берувчи рецептларни ёки бошқа ҳужжатларни сохталаштирганлик учун жавобгарлик мавжудлигини кўрсатмоқда.

Ушбу давлатларда гиёҳвандлик воситалари, психотроп моддалар ва прекурсорлар рўйхатига киритилган, дори воситалар фақат рецепт орқали белгиланган тартибда реализация қилиниши белгиланган.