O‘zbekiston | 21:22 / 18.05.2020
16846
2 daqiqa o‘qiladi

XVJ O‘zbekistonga 375 million dollar ajratishni tasdiqladi

Xalqaro valuta jamg‘armasi direktorlar kengashi joriy yilning 18 may kuni Koronavirus pandemiyasining O‘zbekiston Respublikasi iqtisodiyotiga salbiy ta'sirini yumshatish uchun O‘zbekiston Respublikasiga 375 million AQSh dollari ekvivalentidagi imtiyozli qarz mablag‘lari ajratilishini tasdiqladi. 

Foto: Shutterstock

Mazkur mablag‘lar Moliya vazirligi huzuridagi Inqirozga qarshi kurashish jamg‘armasini to‘ldirishga yo‘naltiriladi.Bu haqda Bosh vazir o‘rinbosari - Iqtisodiy taraqqiyot va kambag‘allikni qisqartirish vaziri Jamshid Qo‘chqorovning Twitter akkauntida xabar qilgan. 

«XVJ tomonidan imtiyozli qarz mablag‘larini ajratishda an'anaviy ravishda mamlakatdagi makroiqtisodiy vaziyat va davlat qarzi bilan bog‘liq xatarlar tahlil qilindi», – deb yozgan vazir. 

XVJ tomonidan e'lon qilingan hisobotda koronavirus pandemiyasining respublika iqtisodiyotiga salbiy ta'siri natijasida YaIMning o‘sish sur'atlari 1,5 foizgacha pasayishi prognoz qilingan. Shu bilan birga O‘zbekiston Respublikasining davlat qarziga xizmat ko‘rsatish salohiyati yuqori darajada saqlab qolinayotgani ta'kidlab o‘tilgan.

Qayd etilishicha, O‘zbekiston Respublikasi prezidentining global inqiroz va Koronavirus pandemiyasining milliy iqtisodiyotga ta'sirini kamaytirish bo‘yicha olib borayotgan siyosatlari xalqaro moliya institutlaridan imtiyozli tashqi qarz jalb qilishda qulay imkoniyatlar bermoqda.

Mavzuga oid