17 may kuni Afg‘oniston prezidenti Ashraf G‘ani va sobiq bosh vazir Abdulla Abdulla tomonidan imzolangan kelishuv etnik o‘zbeklar yetakchisi general Abdulrashid Do‘stumga mamlakat marshali unvoni berishni ko‘zda tutadi. Bu haqda Tolo News xabar bermoqda.

«Sobiq vitse-prezident, general Abdulrashid Do‘stum prezident farmoniga binoan marshal unvonini oladi. U, shuningdek, Oliy hukumat kengashi va Milliy xavfsizlik kengashiga a'zo bo‘ladi», - deyiladi kelishuv matnida.

Avvalroq, Afg‘oniston prezidenti Ashraf G‘ani va uning siyosiy raqibi bo‘lgan sobiq bosh vazir Abdulla Abdulla yakshanba kuni hokimiyatni taqsimlash to‘g‘risida siyosiy kelishuvga erishgani xabar qilingan edi.

O‘tgan yilning sentabr oyida bo‘lib o‘tgan prezidentlik saylovlaridan keyin ikki nomzod bir vaqtning o‘zida prezidentlik qasamyodini qabul qildi: amaldagi prezident Ashraf G‘ani ham, mamlakat bosh vaziri Abdulla Abdulla ham o‘z g‘alabasi to‘g‘risida e'lon qildi.

Afg‘oniston Markaziy saylov komissiyasi G‘ani kichik farq bilan g‘alaba qozonganini ma'lum qildi, ammo Abdulla ovoz berish natijalari soxtalashtirilgan deb hisoblashini bildirdi.

Gani va Abdulla bir vaqtning o‘zida inauguratsiya marosimini o‘tkazgan mart oyidan beri siyosatchilar o‘zaro kelib olishga harakat qilishdi. Endi esa ular kelishuvga imzo chekishdi, unga ko‘ra G‘ani prezident bo‘lib qoladi, lekin Abdulla hukumatga vazirlarni xuddi davlat rahbari sifatida tayinlash huquqini oladi.

O‘zbekiston Afg‘onistonning siyosiy yetakchilari tomonidan inklyuziv hukumat va Milliy yarashuv bo‘yicha Oliy kengashni tashkil etish to‘g‘risidagi kelishuvga erishilganini qo‘llab-quvvatladi.