17 may kuni Yangiyer shahar hokimligi «Do‘stlik» mahallasidagi holat aks etgan suratlarni taqdim etdi.
Ma'lum qilinishicha, «Do‘stlik» MFY da jami 4729 nafar aholi – 715ta xonadon va 867ta oila mavjud.
O‘rganish natijalariga ko‘ra, yaroqsiz holga kelgan uy-joylar soni 644tani tashkil etgan. Ushbu xonadonlardagi 804ta oilada 4287 nafar aholi istiqomat qilgan.
Toshqin vaqtida mahalladan evakuatsiya qilingan fuqarolar tumandagi 12ta mahalladagi aholi xonadonlari, ta'lim muassasalari va boshqa viloyat (Jizzax, Samarqand, Toshkent) tumanlariga joylashtirilgan.
Hozirda Yangi hayot aholi yashash punktida talafot oqibatlarini bartaraf etish va aholiga yetkazilgan zararni tiklash bo‘yicha ishlar olib borilmoqda.
Buning uchun Markaziy harbiy okrugida joylashgan harbiy qismlarning harbiy xizmatchilari va Yangiyer shahar hokimligi tomonidan yuborilgan mashina-mexanizmlar, shuningdek, maxsus transportlar jalb etilgan.
Hududda harbiy xizmatchilar tomonidan 801ta obekt – 715ta xonadon, 52ta ko‘p qavatli uy, 29ta tadbirkorlik sub'yekti va 5ta ijtimoiy soha obektida tozalash ishlari olib borilmoqda.
Respublika maxsus Ishchi guruhi tomonidan mazkur mahallada talafot yetgan obektlarni ta'mirlash uchun Qoraqalpog‘iston Respublikasi mas'ul etib biriktirilgan.
Hozirda Qoraqalpog‘iston Respublikasining 88ta qurilish tashkiloti va 1050 nafar quruvchilari Sardobaga yetib kelgan. Quruvchilar tomonidan «Do‘stlik» mahallasi Yangi hayot aholi yashash punktidagi 90 ta uy-joy qayta tiklanadi.
17 may tongida Yangiyer shahar sektor rahbarlari va qurilish ko‘mak shtabi a'zolari ishtirokida amalga oshirilayotgan bunyodkorlik ishlari rivojini tilab qurbonlik qilindi va hasharchilarga osh damlandi.
