Markaziy bank xabariga ko‘ra, joriy yil aprel oyida ichki valuta bozorida so‘mning xorijiy valutalarga nisbatan almashuv kursi tebranuvchanligining oshishi kuzatildi.
So‘mning AQSh dollariga nisbatan almashuv kursi oy boshiga nisbatan 1,8 foizga oshib, 9 762 so‘mni tashkil etdi (yil boshiga nisbatan 2,7 foizga).
Bildirilishicha, so‘mning birja kursining o‘zgarishi talab va taklifning ichki va tashqi omillari ta'sirida, birinchi navbatda, joriy operatsiyalar hisobvarag‘i o‘zgarishi asosida shakllanadi.
Koronavirus tarqalishi oldini olish bo‘yicha hamkor davlatlarda va respublikada amalga oshirilayotgan chora-tadbirlar natijasida savdo hamda investitsiyalar bilan bog‘liq operatsiyalarning sekinlashishi, o‘z navbatida, import-eksport hajmlarining qisqarishiga va mos ravishda ichki valuta bozorida faollikning pasayishiga olib keldi.
Joriy yilning mart oyida eksport tushumlari hajmi oldingi oyga nisbatan 10 foizga kamaydi.
“Karantin choralari va iqtisodiy faollikning sekinlashishi, shuningdek, Rossiya va Qozog‘istonda milliy valutalar kursining devalvatsiyasi tufayli transchegaraviy pul o‘tkazmalarida ham pasayish tendensiyasi kuzatilmoqda.
Joriy yil mart oyida mamlakatimizga kirib kelgan pul o‘tkazmalari hajmi 296 mln. dollarni tashkil etib, fevral oyiga nisbatan 23 foizga pasaygan bo‘lsa, aprelning dastlabki 8 ish kunida mart oyining mos davriga nisbatan 3 barobarga qisqardi.
Ushbu omillar jismoniy shaxslar bilan operatsiyalar segmentida so‘mning almashuv kursi bo‘yicha ma'lum nisbatan kutilmalarning shakllanishiga olib keldi. Mart oyidan boshlab aholi tomonidan xorijiy valuta sotib olish hajmining sezilarli darajada o‘sishi kuzatilmoqda.
Xususan, mart oyida jismoniy shaxslar tomonidan chet el valutasini sotib olish hajmining oylik o‘sishi 45 foizni tashkil etgan bo‘lsa, aprelning dastlabki 8 ish kunida sotib olish hajmi o‘tgan oyning mos davriga nisbatan 28 foizga ko‘paydi”, - deyiladi MB ma'lumotida.
Ta'kidlanishicha, yuqoridagi omillar, shuningdek, asosiy savdo hamkorlar milliy valuta kurslarining sezilarli darajada qadrsizlanishi natijasida ichki valuta bozorida milliy valuta kursining ma'lum darajada qadrsizlanishi va shunga mos ravishda so‘mning asosiy savdo hamkorlar valutalariga nisbatan real effektiv almashuv kursi tafovutining qisqarishi kuzatilmoqda.
Joriy yil mart oyidan boshlab Rossiya rublining AQSh dollariga nisbatan almashuv kursi 10,3 foizga, qozoq tengesi – 12 foizga, turk lirasi – 7,6 foizga va qirg‘iz somi – 11,2 foizga qadrsizlandi.
Markaziy bank so‘m almashuv kursining qadrsizlanishi ehtimolini past darajada baholamoqda. Dastlabki prognozlarga ko‘ra, qisqa muddatli davrda so‘m almashuv kursi ma'lum bir kichik o‘zgarishlardan keyin o‘zining fundamental trendiga yaqin darajada shakllanadi.
Shu bilan birga, Markaziy bank tijorat banklari kassalarida konverciya operatsiyalarini amalga oshirish uchun yetarli miqdorda naqd xorijiy valuta mavjudligini va barcha banknotalar dezinfeksiya qilinganligini ma'lum qildi. Banklarning ayirboshlash shoxobchalari odatdagi rejimda ishlamoqda va naqd xorijiy valutani sotish va sotib olish bo‘yicha hech qanday cheklov va to‘siqlar o‘rnatilmagan.
