«Осон бўлмади, аммо буни биргаликда уддаладик». Махсус контейнерда сақланган Сервер Жепаров карантиндаги 14 кунлик ҳаёти ҳақида гапириб берди

Спорт 00:46 / 13.04.2020 75782

«COVID-19. Махсус жиҳозланган контейнердаги 14 кунлик карантин», - дея бошланади Жепаровнинг ижтимоий тармоқдаги пости.

«Президентимиз Шавкат Миромонович Мирзиёевга ўз халқига кўрсатаётган ғамхўрлиги учун раҳмат. Шахсий фикримча, контейнерлар карантинда яшаш учун зарур бўлган барча нарса билан жиҳозланган. 4 кишидан яшадик. Тоза матрасли тўшамлари билан икки ўринли ётоқ. Телевизор, кондиционер, ҳожатхона, ҳаммом, иссиқ ва совуқ сув, стационар телефон, сув қайнатиш учун чойнак ва пиёлалар. Гигиена воситалари, тиш пастаси, чўтка, ниқоблар, қўлқоплар, совун, шампунь. Челак, тозалаш учун латта. Кунига уч маҳал овқат: котлетлар, товуқ, гуруч, гречка, перловка, макарон, палов, сув, салатлар, олмалар, мандаринлар – ҳаммаси карантинга риоя қилинган ҳолда бир марталик ишлатиладиган идишларда олиб келинарди. Нонуштага чой билан ва печеньелар, йогурт, тухум, бўтқа, сарёғ, пишлоқ, сосискалар.

Карантиндаги 14 кун давомида бизга хизмат қилган ходимларга, таҳлилларни олган шифокорларга, кундалик ҳар қандай муаммоларимизни ҳал қилганлар – чинданам бу сиз томондан кўрсатилган қаҳрамонлик бўлди, барчаси учун чин қалбимдан миннатдорчилик билдириб қоламан. Биз буни биргаликда уддаладик, бу осон бўлмади. Бундай ғамхўрлик ва шароитлар у ердаги яшашимизни енгиллаштирди. Мамлакатимиз президенти ва унинг жамоасига яна бир марта раҳмат.

Энди мен ва ўғлим уй карантинидамиз. Келинглар, ҳаммамиз карантин қоидаларига риоя қилган ҳолда пандемияга қарши биргалашиб курашамиз. Фақатгина шу йўл орқали COVID-19 вируси устидан ғалаба қозона оламиз», - дея ёзади Сервер Жепаров. 

Маълумот учун, Сервер Жепаров уч ҳафта олдин Россияга бориб, Татаристон пойтахти Қозон шаҳрида бўлиб қайтган эди. Собиқ футболчи ўғли билан Тошкентга қайтгач, карантинга олинган. Уларда коронавирус аломатлари сезилмагач, уйларига жавоб берилган.

Кўпроқ янгиликлар