Soliqchilarning davlat ijrochilari bilan o‘zaro hamkorligi uchun elektron tizim ishga tushiriladi

Loyiha Soliq kodeksining 123-moddasi va “Sud hujjatlari va boshqa organlar hujjatlarini ijro etish to‘g‘risida”gi Qonun asosida ishlab chiqilgan, deb yozmoqda Norma.
 
Nizom normalari yuridik shaxslar va yakka tartibdagi tadbirkorlarning tan olingan soliq qarziga nisbatan tatbiq etiladi. SKning 60-moddasiga asosan talabnoma berilgan sanadan boshlab 10 kun ichida soliq to‘lovchi tomonidan e'tiroz bildirilmagan qarz shunday qarz hisoblanadi.
 
Talabnoma soliq to‘lovchiga quyidagi muddatlarda yuboriladi:

soliq hisoboti bo‘yicha yuzaga kelgan soliq majburiyati bo‘yicha har bir soliq turiga - to‘lov muddatidan keyingi sanadan boshlab 3 kun ichida;

soliq tekshiruvi natijalari bo‘yicha aniqlangan soliq qarzi bo‘yicha - qaror kuchga kirgan sanadan boshlab 3 kun ichida;

penya yoki foizlar bo‘yicha - hisoblangan sanadan boshlab 3 kun ichida.
 
Soliq to‘lovchi tomonidan soliq qarzini uzish to‘g‘risidagi talabnoma olingan kundan e'tiboran 30 kalendar kuni ichida qarzdorlik to‘lanmagan yoki to‘liq to‘lanmagan taqdirda soliq organi qarzni soliq to‘lovchining mol-mulki hisobidan undirish bo‘yicha qaror qabul qiladi. U 3 ish kuni ichida elektron shaklda soliq to‘lovchi ro‘yxatdan o‘tgan yoki soliq majburiyati yuzaga kelgan joydagi majburiy ijro byurosiga yuboriladi.
 
Soliq organi va MIB o‘rtasida o‘zaro hamkorlik qilish uchun taraflar o‘rtasida o‘zaro tasdiqlangan texnik topshiriqqa asosan elektron ma'lumot almashuv yo‘lga qo‘yiladi. Elektron tizim ishlamay qolgan hollarda qaror qog‘ozda chop etilib, pochta xizmati orqali yuborilishi yoki bevosita topshirilishi mumkin. U qanday formatda olinganidan qat'i nazar, qaror u olingan paytdan boshlab ikki oy ichida ijro etilishi lozim.
 
Loyiha 2020 yil 19 martga qadar muhokama qilish, fikr-mulohaza va takliflarni kiritish uchun joylashtirilgan.
 
Loyiha o‘zgartirilishi, unga qo‘shimcha kiritilishi yoki rad etilishi mumkin.