Meksika prezidenti Andres Manuel Lopes Obrador Microsoft kompaniyasi mamlakatdagi IT-loyihalariga besh yil davomida 1,1 milliard dollar mablag‘ kiritishini ma'lum qildi.

"Microsoft turli sohalar uchun 1,1 milliard dollar investitsiya kiritishga qaror qildi, Meksika xalqi nomidan ularga minnatdorlik bildiramiz", - dedi Obrador Twitter sahifasida.

Microsoft ijrochi direktori Satya Nadellaning so‘zlariga ko‘ra, "Meksika uchun innovatsiyalar" rejasi 5 yilga mo‘ljallangan bo‘lib, aholining raqamli texnologiyalardan foydalanishini kengaytirishga qaratilgan.

Investitsiyalar dasturi doirasida mamlakatda bulutli ma'lumotlar markazlari tashkil etiladi, oliy ta'lim muassasalari bilan hamkorlik dasturi uchta virtual laboratoriya va auditoriyalar yaratishni o‘z ichiga oladi.

Avvalroq Microsoft kompaniyasi va Muhammad al-Xorazmiy nomidagi ixtisoslashtirilgan maktab o‘rtasida hamkorlik memorandumi imzolangani haqida xabar berilgandi.  Unga ko‘ra, kompaniya mutaxassislari har oyda bir marta maktab o‘quvchilari uchun ochiq dars o‘tib berishadi.