«Ҳудудий электр тармоқлари» Самарқандда тадбиркорларнинг ёппасига тармоқдан узилишига муносабат билдирди

Жамият 18:59 / 17.02.2020 3737

Унда кўплаб самарқандлик тадбиркорлар бир вақтда тармоқдан узилгани ҳақида гап борган

 «Ҳудудий электр тармоқлари» АЖ бу хабар бўйича муносабат билдирди.

«Ўзбекистон Республикаси Вазирлар Маҳкамасининг «Электр энергияси ва табиий газдан фойдаланиш тартибини такомиллаштиришга доир қўшимча чора-тадбирлар тўғрисида»ги 22-сон қарори билан тасдиқланган «Электр энергиясидан фойдаланиш» қоидаларига кўра юридик шахслар электр энергияси учун тўловни олдиндан тўлаган ҳолда фаолият юритади.

Шунга кўра тадбиркорлик субеъктлари 100 фоиз олдиндан ҳисоб рақамлари орқали пул ўтказиш йўли билан электр энергияси учун ҳақ тўлаш тартиби ўрнатилган. Самарқанддаги ҳолатда янги АСКУЭ тизимига уланган тадбиркорлар электр энергияси учун етарли тўлов бўлмаганлиги сабабли автоматик тарзда тармоқдан ажратилган.

Шанба ва якшанба Ўзбекистон Республикаси Марказий банки томонидан ўрнатилган тартибга кўра банк тизимида дам олиш кунлари бўлгани учун бу кунларда электр энергияси учун тўловни фақатгина электр тармоқлари орқали амалга ошириш мумкин.

Шу ўринда «Ҳудудий электр тармоқлари» АЖ томонидан тадбиркорликка енгиллик яратиш мақсадида АСКУЭ тизимига қарздорлик мавжуд бўлса-да, шанба ва якшанба кунлари тармоқдан ажратмаслик функцияси киритилганини эслатиб ўтмоқчимиз.

Тадбиркорлар томонидан Click, Paynet ва банк орқали электр энергияси учун тўлов имкониятлари ҳозирча назарда тутилмаган. Юқорида айтиб ўтилганидек, юридик шахслар фақатгина ҳисоб рақамлари орқали элект энергияси учун тўловларни амалга оширишлари мумкин. «Ҳудудий электр тармоқлари» АЖ томонидан тадбиркорлик субъектлари учун тўлов тизимларини такомиллаштириш бўйича амалий ишлар олиб борилаётганлигини маълум қиламиз»,— дейилади «Ҳудудий электр тармоқлари» АЖнинг Kun.uz`га тақдим этган расмий жавобида.

Кўпроқ янгиликлар