Африкада охирги 25 йил ичида чигиртканинг энг катта кўламли ёпирилиши кузатилмоқда

Жаҳон 23:49 / 24.01.2020 15792

Африкадаги Сомали (Африка шохи) яримороли ҳамда яқин атрофдаги давлатлар ҳудудларида охирги 25 йил ичида чигиртканинг энг катта кўламли ёпирилиши кузатилмоқда. Бу ҳақда CNN телеканали хабар берди.

Таъкидланишича, чигиртка ёпирилган ҳудудларда 19 млндан кўпроқ одам яшайди. Уларнинг озиқ-овқат хавфсизлиги мислсиз таҳдид остида қолмоқда. Ҳаётий муҳим экинлар буткул яксон бўлиши мумкин.

Чўл чигирткаси ушбу минтақада ҳар доим ҳам кузатилмайди – унинг охирги ёпирилиши 2007 йилда кичикроқ кўламларда юз берган. Тахмин қилинишича, ҳашаротнинг тарқалишига 2019 йилдаги об-ҳаво ва иқлим шароитлари, жумладан октябрдан декабргача давом этган кучли ёмғирлар олиб келган.

БМТнинг Озиқ-овқат ва қишлоқ хўжалиги ташкилоти (ФАО) маълумотларига кўра, бу вазият “энг ёмон ҳолатда” ўлат келтириб чиқариши мумкин. Ташкилотда таъкидланишича, чўл чигирткаси галалари узоқ вақт ҳавода қолиши ҳамда 130 км ва ундан кўпроқ масофани босиб ўтиши мумкин.  

Экспертлар чигиртка галалари қўшни Уганда ва Жанубий Суданга миграция қилиши мумкинлигидан огоҳлантиришмоқда. Чигирткаларни йўқотиш учун ҳар куни ҳаводан пестицидлар пуркалмоқда.

Сомали яримороли ҳудудига асосан Сомали, қисман Эфиопия, Эритрея ва Жибути ҳудудлари киради.

Кўпроқ янгиликлар