Фарғонада ЙПХ инспектори ўқитувчини ерга йиқитиб, мажбурлаб машинага ўтқизди

Жамият 13:35 / 14.01.2020 130740

Ижтимоий тармоқларда ЙПХ ходими ва фуқаро иштирокида юз берган ҳолат тасвирланган видео тарқалди. Унда ЙПХ ходими ёшроқ йигитни ерга йиқитиб, автомобилга мажбурлаб чиқараётганини кўриш мумкин.

Ўзбекистон Республикаси ИИВ ЙҲХББ ахборот хизмати хабарига кўра, ушбу ҳолат Фарғона вилояти Фарғона тумани ҳудудидаги ҳарбий полигонда, 2020 йилнинг 11 январь куни 14 январь - Ватан ҳимоячилари кунига бағишланган тадбир бўлаётганлиги сабабли “Фарғона-Чимён” йўли ЙПХ ходимлари томонидан ёпилган вақтида, Фарғона тумани Оқбилол қишлоғидаги 22-умумий ўрта таълим мактаби ўқувчиларини полигондаги тадбирга ўқитувчилар ҳамроҳлигида автобусда олиб келинган пайтда содир бўлган. 

“Шу ҳудудда хизмат олиб бораётган Фарғона вилояти ИИБ ЙҲХБ ЙПХ инспектори И.Одилов мактаб ўқитувчиларига тадбир сабабли йўл ёпилганлигини, раҳбарлардан рухсат сўраш кераклигини айтган вақтида, ўқитувчи: “менда рухсатнома бор, ўтишим керак” деб, инспекторга қўпол муомала қилган ва инспектор билан мактаб ўқитувчиси ўртасида келишмовчилик келиб чиққан”, - дейилади хабарда. 

Бирламчи маълумотга кўра, мактаб ўқитувчиси ЙПХ ходимини ҳақорат қилганлиги учун ходим уни ерга йиқитиб, патруль автомобилига ўтқизмоқчи бўлган.

Мазкур ҳолат юзасидан ИИВ ЙҲХББ томонидан назоратга олиниб, айни пайтда хизмат текшируви олиб борилаётгани айтилади. 

Кўпроқ янгиликлар