Amerika harbiylari Suriya shimoli-sharqidagi ikkita bazani tark etdi, deb xabar berdi SANA agentligi.

Agentlikning ma'lumot berishicha, 40 dona yuk mashinasi Xurab-Jayr bazasidan Iroq bilan chegara tomon yo‘l olgan. O‘z navbatida Shaddodiy shahridagi bazadan ham 50 dona yuk mashinasi Iroq bilan chegaradagi al-Volid nazorat-o‘tkazish punkti tomonga yo‘nalgan.

Xabarda aytilishicha, bu "bosqinchi qo‘shinlarning uzil-kesil chiqib ketishiga tayyorgarlikdir".

8 yanvarga o‘tar kechasi Iroq g‘arbidagi AQSh askarlari joylashgan Ayn al-Asad harbiy-havo bazasi Eron tomonidan raketa hujumiga uchradi. Bu haqda Islom inqilobi soqchilar korpusi tomonidan tarqatilgan bayonotda ma'lum qilindi.

Hujum eronlik general Qosim Sulaymoniyning o‘limi uchun o‘ch olish harakati deb ataldi.