Энг сердаромад Youtube-блогерлар рейтинги эълон қилинди 

Lifestyle 22:54 / 18.12.2019 12872

Forbes нашри 2019 йил учун энг сердаромад Youtube-блогерлар рейтингини эълон қилди. 

Рейтингнинг 1-ўрнини 8 ёшли америкалик Райан Кажи эгаллади. У янги ўйинчоқлар билан танишадиган Ryan ToysReview канали бир йил ичида 26 млн доллар даромад келтирган. Эътиборлиси, Райан энг сердаромад Youtube-блогерлар рейтингига иккинчи йил етакчилик қилмоқда.

2-ўринни 5 нафар йигит спорт трюкларини бажариши видеолари жойланадиган Dude Perfect канали эгаллаган. Forbes 2019 йилда бу каналнинг даромадини 20 млн долларга баҳолаган.

3-ўринни эса 5 ёшли россиялик Анастасия Радзинская эгаллади. Настянинг Youtube’даги каналлари 2019 йилда 18 млн доллар даромад келтирган. Айни вақтда ота-онаси билан АҚШга кўчиб ўтган қизча 7 тилдаги видеолари эвазига дунёда энг тез тараққий этаётган блогерлардан бирига айланди. У билан Lego ва Danone каби йирик компаниялар ҳамкорлик қилади.  

Шунингдек, энг сердаромад Youtube-блогерлар ўнталигига Rhett and Link (17,5 млн доллар), Жеффри Стар (17 млн доллар), Preston (14 млн доллар), PewDiePie (13 млн доллар), Markiplier (13 млн доллар), DanTDM (12 млн доллар) ва VanossGaming (11,5 млн доллар) киритилган.

Кўпроқ янгиликлар