Ота-оналарнинг 45,2 фоизи болаларни жисмоний жазолаш мумкин деб ҳисоблайди – «Оила» маркази тадқиқоти

Жамият 19:18 / 05.12.2019 7229

«Оила» илмий-амалий тадқиқот маркази матбуот хизматининг маълумот беришича, марказ томонидан ўтказилган тадқиқот натижалари 44,4 фоиз синф раҳбари, 39,5 фоиз фан ўқитувчиси, мактаб психологи ва 45,2 фоиз ота-она болани жисмоний жазолаш мумкин деб ҳисоблашини кўрсатди.

Мазкур тадқиқот Тошкент шаҳри ва Наманган, Тошкент вилоятларида ўтказилган. 

Тадқиқот иштирокчиларидан ўз фикрларига  изоҳ сўралганда, жисмоний жазолаш орқали гапга қулоқ солмайдиган болани тарбиялаш жамиятда ҳуқуқбузарликлар ва жиноятларнинг олдини олади, деб таъкидлаган.

Бундан ташқари, болага нисбатан оилада бешафқат муносабатнинг сабаблари сифатида респондентларнинг 46,8 фоизи ота-оналарнинг носоғлом турмуш тарзи ҳамда улардаги педагогик, психологик ва ҳуқуқий билимлар пастлиги, 26,5 фоиз ота-она ва фарзанд муносабатларида низоли вазиятларнинг пайдо бўлиши, 6,6 фоиз оиланинг моддий аҳволи деб айтган бўлса, 20,1 фоиз иштирокчи  болаларнинг ўзини сабабчи қилиб кўрсатган.

«Бундан ташқари, жисмоний жазолаш билан тарбияланган болаларда салбий психологик оқибатлар пайдо бўла бошлайди, ишончсизлик, қўрқув ва руҳий тушкунлик комплекслари ривожланади, жумладан, уларда бировлар фикрига тобе бўлиб қолиш юзага келади ва уларда мустақил фикрлаш йўқола боради.

Натижада, бундай болалар жамиятда ўзига муносиб ўринни эгаллаш борасида қийинчиликларга дуч келади», - дея маълумот беради «Оила» маркази.  

Жумладан, марказ олим ва мутахассислари ана шундай жазолаш туфайли болаларнинг жамиятда тан олинишида қийинчиликка учрашлари ва оқибатда тарбияси оғир бўлган болалар сафига кириб қолишларидан хавотирда эканликларини билдиришди. 

Кўпроқ янгиликлар