Сурхондарё вилояти ҳокими Тўра Боболов воҳа тадбиркорларига мурожаатида нималарга тўхталди?

Ўзбекистон 00:30 / 15.11.2019 4888

Президент Шавкат Мирзиёев томонидан 7 ноябрь куни тадбиркорлик ва кичик бизнесни жойларда янада ривожлантириш учун қўшимча имкониятларни аниқлаш ва ишга солиш бўйича кўрилаётган чоралар самарадорлиги ҳамда бу борадаги долзарб вазифаларга бағишланган видеоселектор йиғилиши ўтказилган эди.

Мазкур йиғилишида президент: «Бундан буён тараққиёт ва фаровонликка фақатгина тадбиркорликни ривожлантириш ва қўллаб-қувватлаш орқали эришиш мумкин», деган фикрни илгари суриб, ҳокимлар, сектор раҳбарларига тадбиркорларга мурожаат билан чиқиш топшириғини берган эди.

Kun.uz Сурхондарё вилояти ҳокими Тўра Боболовнинг воҳа тадбиркорларига қилган мурожаатининг диққатга сазовор қисмларини келтириб ўтади.

«Президентимиз томонидан илгари сурилган «Иккита иш жойи яратган одамни елкамда кўтараман!», «Агар тадбиркорга шароит яратмасак натижа бўлмайди», «Ҳар бир тадбиркорга – кўмакдош, елкадош ва мададкормиз!» деган устувор ғоялар бугун барча даражадаги раҳбарларга дастуруламал бўлиб хизмат қилиши лозим.

...Вилоятдаги тадбиркорлик субъектлари сони бугунги кунда 18 минг 705тани ташкил этиб, банд аҳолининг 74 фоизи, бюджет даромадларининг эса 84 фоизи айнан хусусий тадбиркорлик субъектлари ҳиссасига тўғри келмоқда.

...Келиб тушаётган мурожаатларни таҳлил қиладиган бўлсак, бугунги кунда тадбиркорларни қийнаётган 2 та муҳим масала бор: бу ер ажратиш ва кредит бериш масаласи.

...Вилоятимизда 2016 йилга қадар бизнес юритишда ва тадбиркорлик фаолиятини ривожлантиришда жуда катта тўсқинликлар мавжуд бўлганлиги, бу ҳолатлар тадбиркорликни ривожлантиришга жуда катта салбий таъсир кўрсатиб келганлигини кўпчилик яхши билади.

...«ИНДЕНИМ» бренди остида республика бўйича асосан маҳаллий маҳсулотларни сотишга мўлжалланган 12та йирик савдо мажмуаси ташкил этилди. Корхона таъсисичиси Шерзод Шаймардонов сурхондарёлик бўлса-да, вилоятда тадбиркорлик муҳити яхши бўлмаганлиги сабабли шу вақтгача республикамизнинг бошқа вилоятларида ўз бизнесини олиб борган.

...Бугун вилоятимизни ижтимоий-иқтисодий ривожлантириш юзасидан қатор вазифаларни белгилаб олганмиз ва бу вазифаларни Сиз азиз тадбиркорлик субъектлари вакиллари билан биргаликда амалга оширишимиз лозим.

  • Биринчидан, вилоятимизда импорт ўрнини босувчи ва экспортбоп маҳсулотлар ишлаб чиқаришга ихтисослашган корхоналарни кўпайтиришимиз;
  • иккинчидан, янги ташкил этилган тадбиркорлик субъектлари сонини ўтган йилга нисбатан 2 баробарга оширишимиз ва бунда тадбиркорлик субъектлари сонига эмас, сифатига ва доимий ишлашига эътибор қаратишимиз;
  • учинчидан, вилоятда фаолият кўрсатаётган кичик бизнес ва хусусий тадбиркорлик субъектларини учга – «Яхши», «Ўрта» ва «Ёрдамга муҳтож» тоифаларига ажратиб, «Ёрдамга муҳтож» тадбиркорлик субъектларини янада қўллаб-қувватлаш орқали «Яхши» тоифага ўтказишимиз;
  • тўртинчидан, бўш ер майдонларини аниқлаш, уларни «E-IJRO аукцион» электрон савдо майдонига чиқариш орқали тадбиркорлик субъектларига бериш ва мазкур ер майдонларида ишлаб чиқариш ва хизмат кўрсатиш объектларини ташкил этишимиз;
  • бешинчидан, вилоятда мавжуд 1327та бўш турган объектлардан самарали фойдаланиш орқали ишлаб чиқариш ва хизмат кўрсатиш объектларини ташкил этишимиз ва янги иш жойларини яратишимиз;
  • олтинчидан, вилоятдаги 56та бўш турган давлат мулки объектларини сотиш орқали мазкур объектлар негизида замонавий ишлаб чиқариш ва хизмат кўрсатиш объектларини ташкил этишимиз;
  • еттинчидан, вилоятда фаолият юритмаётган 3000га яқин тадбиркорлик субъектлари фаолиятини тиклаш чораларини кўришимиз;
  • саккизинчидан, корхона ва ташкилотларда норасмий ишлаётган ходимлар фаолиятини легаллаштиришимиз лозим.

Шундай экан, барчангизни муҳтарам юртбошимизнинг юксак ишончини оқлаб, мамлакатимиз равнақи ва халқимиз фаровонлигига муносиб ҳисса қўшиш учун сидқидилдан ҳалол ва фидокорона меҳнат қилишга чақираман!

Ўз фаолиятингизни янада кенгайтиришингизни, қўшимча имкониятларни ишга солиб, янги лойиҳаларни амалга оширишингизни, банд бўлмаган аҳолини доимий иш билан таъминлаш юзасидан зарурий чоралар кўришингизни сўрайман.

Бу ишларни амалга оширишда мен вилоят ҳокими сифатида Сизларни доимо қўллаб-қувватлашга, кўмакчингиз бўлишга тайёрман.

Бу борада:

  • тўлақонли фаолият юритишингиз учун адолат ва қонун устуворлигининг таъминланишига;
  • ҳудудларда тадбиркорликни йўлга қўйиш учун барча шарт-шароитларни яратишга;
  • тадбиркорлик фаолиятингиз юзасидан ноқонуний текширишларга барҳам берилишига, солиқ шаффофлигининг таъминланишига кафолат бераман», — деди вилоят ҳокими Тўра Боболов.

Тадбиркорларга мурожаат қилиш учун вилоят ҳокимлиги ва барча ташкилотларнинг эшиклари ҳамиша очиқлигини таъкидлаган Боболов, иш кунининг исталган вақтида мурожаат қилиш учун телефон рақамларни ҳам эълон қилди: 

Вилоят ҳокими Тўра Боболов – 76 224-16-16;
вилоят прокурори Садриддин Турдиев – 76 223-10-07;
вилоят ИИБ бошлиғи Абдувоҳид Исмоилов – 76 223-41-53;
вилоят ДСБ бошлиғи Сирожиддин Эшматов – 76 221-74-39;
Бош вазир қабулхонаси мудири Абдумалик Алламуродов – 76 221-73-37.

Кўпроқ янгиликлар