O‘yinni juda yaxshi boshlagan Abramov jamoasi o‘zi xohlagan to‘pni nazorat qilishni yaxshi uddaladi. Raqib jarima maydoni oldidagi pressing esa gol urilishiga olib keldi. 16-daqiqada Eldor Shomurodov Ikrom Aliboyevning to‘pni olib qo‘yganidan so‘ng raqib darvozasini ishg‘ol qildi. Ammo yigitlarimizning xursandchiligi uzoqqa cho‘zilmadi. 23-daqiqada Salmon al-Faraj penaltini gol bilan yakunladi.

Ikkinchi bo‘limni ham futbolchilarimiz yaxshi boshlashdi. 56-daqiqada Farrux Sayfiyevning zarbasidan so‘ng to‘p saudiyalik futbolchining qo‘liga tegdi va hakam endi Saudiya darvozasiga penalti belgiladi. Standartni Otabek Shukurov bexato amalga oshirdi.

Ammo o‘yin oxirida iroda ko‘rsatgan saudiyaliklar g‘alabani ilib ketishdi. 85-daqiqada Salmon al-Farajning zarbasi rikoshet orqali golga aylandi. 90-daqiqada esa bir muddat «Vilyarreal»da tajriba orttirgan Salim al-Dosari super goli bilan Saudiyaga g‘alaba keltirdi.

O‘yindan keyin Vadim Abramov raqib hech qanday jabhada ustunlik qilmaganini, ularning gollari mantiqiy bo‘lmaganini aytdi. Raqib murabbiyi Erve Renar ham jamoasi futbolchilarning individual mahorati evaziga g‘alaba qozonganini yashirmadi.

Quyida O‘zbekiston — Saudiya Arabistoni o‘yinidan tayyorlangan fotoreportajni e'tiboringizga havola qilamiz.