Yaponiyaning Kyoto Animation studiyasida yong‘in uyushtirgan jinoyatchi aybini tan oluvchi ko‘rsatmalar bera boshladi.  

Yong‘inni sodir etgan 41 yoshli Sindzi Aoba o‘z aybini to‘liq tan olgan va maqsadi aynan studiya xodimlarini nishonga olish bo‘lganini ta'kidlab o‘tgan. 

“Menga o‘lim jazosi berilishi muqarrar”, deb aytgan ayblanuvchi. Uning ta'kidlashicha, u yong‘inni sodir etish uchun studiyaning 1-filialini u yerda eng ko‘p sonda odam ishlagani uchun tanlagan.

Joriy iyulda ayblanuvchi Kyoto Animation anime studiyasi binosiga “Hammang yo‘q bo‘llaring” deb hayqirgancha bostirib kirib, polga benzin quyib, binoga o‘t qo‘ygan. U bir necha daqiqadan keyin politsiya tomonidan ushlangan. U qo‘lga olinishi vaqtida studiya undan “novella o‘g‘irlagani”ni aytishga ulgurgan. Ayblanuvchining o‘zi ham ko‘plab kuyish jarohatlari olgani sababli politsiya uni so‘roq qilish uchun uning tiklanib olishini kutishiga to‘g‘ri kelgan.

Yong‘in oqibatida 700 kvadrat metr maydonga ega 3 qavatli bino butkul yonib kul bo‘lgan, 36 kishi halok bo‘lgan, 33 kishi jarohat olgan.

Studiya rahbariyati fojiaga qaramay, o‘z ishini davom ettirayotganini aytgan. Yaponiya hukumati o‘z navbatida kompaniyaga, halok bo‘lganlar oilalari va jabrlanuvchilarga moliyaviy yordam ko‘rsatishga va'da bergan.