9 октябрь куни ижтимоий тармоқларда «МИБчилар ўз бошлиғининг оғзи шалоқлигидан арз қилди» сарлавҳаси остида жойлаштирилган хабар ва видеолавҳа эълон қилинди.

Видеода тасвирланишича, Мажбурий ижро бюроси Пайариқ туман бўлими бошлиғи Зафар Қосимов ўз қўли остидаги ходимларни кечқурун йиғиб, уларнинг орасидан ундирув режасини бажармаган ходимларни ўта қўпол ва ножўя сўзлар билан ҳақоратлаб, шаънини камситган.

Мазкур воқеа юзасидан Мажбурий ижро бюроси Самарқанд вилоят бошқармаси Kun.uz’га расмий муносабат тақдим этди.

 «Хабарларга кўра, Мажбурий ижро бюросининг Пайариқ туман бўлими бошлиғи Зафар Қосимовнинг ходимларни белгиланмаган режани бажармагани учун ножўя сўзлар билан ҳақорат қилгани баён қилинган.

Ўрганишда, Бюронинг Пайариқ туман бўлими бошлиғи З.Қосимов жорий йилнинг 15 сентябрь куни соат 21:00 ларда бўлим биносида бўлимда фаолият кўрсатувчи 33 нафар давлат инспекторлари билан аҳоли ва улгуржи ташкилотлардан энергия ресурслари ва сув истеъмолидан бўлган ундирувни ундириш аҳволи юзасидан йиғилиш ўтказгани маълум бўлди.

Йиғилишда, айрим ходимларнинг белгиланган ундирув режаларини бажармаганликларини важ қилиб, давлат инспекторларини ҳар хил ножўя сўзлар билан ҳақорат қилгани аниқланди.

Мазкур ҳолат бўлимнинг айрим ходимлари томонидан уяли телефон орқали видео ёзувга олиниб, онлайн нашрлар ва ижтимоий тармоқларга юборгани маълум бўлди.

Олиб борилган текширувлар давомида Бюронинг Пайариқ туман бўлими бошлиғи З.Қосимов юқоридаги ҳолатларни тасдиқлаб, содир этган номуносиб хатти-ҳаракатлари учун бўлим ходимларидан кечирим сўраган.

Ҳозирда, З.Қосимовнинг хатти-ҳаракатлари юзасидан хизмат текшируви ҳаракатлари олиб борилмоқда. Текширув натижалари қўшимча маълум қилинади», — дейилади МИБнинг Самарқанд вилоят бошқармаси муносабатида.