Ўзбекистонда саноат робототехникаси ривожи қай даражада?

Технология 20:50 / 02.10.2019 2343

Бугун, 2 октябрь куни Тошкентда саноат робототехникасига бағишланган II халқаро саммит бўлиб ўтди. Мазкур тадбирда саноатда робототехникани жорий қилишнинг афзалликлари, робототехниканинг сўнгги тенденциялари ва Ўзбекистон саноатида робототехникадан фойдаланиш салоҳияти хусусида сўз юритилди.

Конгратбай Шарипов, Ўзбекистон Олий ва ўрта махсус таълим вазири биринчи ўринбосари:

— Иқтисодий ривожланиш кўп жиҳатдан робототехника технологияларига боғлиқ бўлгани боис таълим тизимида робототехника бўйича рақобатбардош кадрларни тайёрлаш масаласини кўриш лозим. Бундай технологияларни нафақат қўллай олиш, балки ярата олиш ҳам муҳим. Мактабларда 4-синфдан бошлаб электротехникадан робототехникагача қамраб олган дастурлар жорий қилинмоқда. Яқинда Жанубий Кореяда бўлиб ўтган робототехника бўйича танловда ўзбек ёшлари учинчи ўринни эгаллагани ҳам Ўзбекистонда бу соҳага қизиқиш ортиб бораётганини кўрсатади.

Олимжон Тўйчиев, Ўзбекистон робототехника федерацияси президенти:

— Саноат робототехникасига бағишланган саммитнинг ўтказилиши мамлакатда бу соҳанинг ривожланиши учун кучли туртки берди.

Халқаро робототехника федерацияси маълумотларига кўра, жорий йилда жаҳон бозорида саноат робототехникаси ўз тарихида рекорд натижани—16,5 млрд доллар баҳосида 422 мингта саноат роботини ташкил қилган. Бунда энг катта кўрсаткич Сингапур ҳиссасига тўғри келади, Сингапурда ҳар 10 минг нафар ишчига 831та робот тўғри келади. Ўзбекистон ҳали бундай рақамлардан узоқ, лекин мамлакатда саноатнинг кенгаяётгани, хорижий ишлаб чиқарувчиларнинг жалб этилаётгани ҳисобига бу борада силжишлар кузатилмоқда. Яқин йилларда робототехникага бўлган талаб ортиб боради ва бу маҳаллий ишлаб чиқарувчиларни сўнгги технологиялардан фойдаланган ҳолда ўз фаолиятини йўлга қўйишга руҳлантириши лозим.

Беҳзод Аюпов, Manganorobot Central Asia бош директори:

— Робототехника бозори Ўзбекистонда энди очиляпти. Ҳозирда асосан UzAvtoSanoat тизимида робототехникадан фойдаланиляпти, бошқа саноат йўналишларида бу борада силжишлар кам. Ишлаб чиқарувчилар робототехникани жорий қилиш ишсизликни келтириб чиқаради, деб ўйламаслиги керак. Инсон омилига бошқа йўналишларда ҳар доим талаб бор.

Даниеле Мангано, Manganorobot S.R.L директорлар кенгаши раиси (Италия):

— Робототехникани ишлаб чиқариш жараёнига олиб кириш дастлаб қиммат бўлиши мумкин. Лекин сифатнинг кўтарилиши, иш тезлигининг ортиши натижасида 3-4 йилда оддий ишчи кучи ва робот меҳнати орасидаги ижобий фарқ сезила бошлайди. Шунинг учун сифат ҳақида қайғурган ишлаб чиқарувчилар робототехника билан дўстлашиши керак.

2018 йилда Тошкентда I Саноатлаштирилган робототехника саммити ўтказилган бўлиб, унда робототехника ривожланаётган Ўзбекистон бозори учун юқори технологик ечимларни жорий қилишнинг афзал усули бўлиб, бу иқтисодиётни ривожлантиришга сезиларли ижобий таъсир кўрсатиши эътироф этилган эди.

Саммитда саноатда робототехниканинг энг илғор технологияларини жорий қилиш бўйича етакчи ҳисобланган Manganorobot (Италия), Аtlas Copco (Швеция), Кuka robotics (Германия), Siemens (Германия), Bai Automaizone ва Аldo Toni (Италия) каби компаниялар иштирок этди. Саммит доирасида маҳаллий ва хорижий компаниялар вакиллари ўртасида робототехника амалиёти бўйича B2B учрашувлари ўтказилди.

Кўпроқ янгиликлар