Ўзбекистон давлат жаҳон тиллари университети талабаси Ҳамидахон Қаҳрамонова Сеулда ўтказилган «Quiz on Korea» танловида ғолиб чиқиб, деярли 10 минг доллар пул мукофотини қўлга киритди.

Жанубий Корея Ташқи ишлар вазирлиги ва «KBS» телеканали томонидан анъанавий тарзда ўтказиб келинадиган «Корея билимдони» танловининг 2019 йилги финал босқичи 21 сентябрь куни Сеулда бўлиб ўтди.

Kun.uz`нинг Жанубий Кореядаги мухбири Элдор Воҳидов берган хабарга кўра, танловда Германия, Англия, Португалия, Россия ва Туркия каби 20та давлат вакиллари ғолиблик учун курашди. Қатнашчиларнинг ёш чегараси 30 ёш этиб белгиланган бўлиб, улар Корея маданияти ва тарихи бўйича саволлар асосида синовдан ўтказилди.

Танловнинг Ўзбекистондаги саралашида биринчи ўринни олиб ҳал қилувчи босқичга чиққан Ҳамидахон Қаҳрамонова Сеулдаги финалда ҳам мутлақ ғолиб бўлди.

Белгиланганидек, юқори учта ўрин эгаларига мос равишда 10 млн вон (деярли 10 минг доллар), 4 млн ва 1 млн вон миқдорида пул мукофотлари топширилди.

Маълумот учун, 21 ёшли ғолиб билимдон Сурхондарё вилоятининг Музработ туманида туғилган. У ЎзДЖТУнинг Таржима назарияси ва амалиёти факультетида корейс тили йўналиши бўйича 3-курсда таҳсил олади.

Қаҳрамонова, шунингдек, жорий йилда KOICA Халқаро ҳамкорлик ташкилоти томонидан ўтказилган Корейс маданияти мутахассислари дастурида ҳам биринчи ўринни олиб, Жанубий Кореяга 80 кунлик таълим грантини қўлга киритган.