Юнон-рум курашчилари ЖЧда битта ҳам олтин олмасдан иккинчи бўлишди. Иккитадан олтин олган японлар ва грузинлар қандай қилиб ортда қолдирилди?

Спорт 15:38 / 19.09.2019 20361

Қозоғистон пойтахти Нур-Султонда спорт курашлари бўйича жаҳон чемпионати давом этмоқда. Унда қатнашган ўзбекистонлик юнон-рум курашчилари учта медал олишди. Арам Варданян (-72 кг) финалгача етиб бориб, кумуш медални қўлга киритган бўлса, Рустам Ассакалов (-87 кг) ва Жалгасбай Бердимуратов (-77 кг) бронза соҳиби бўлишди. Ўзбекистонлик юнон-рум курашчилари умумжамоа ҳисобида иккинчи ўринни қўлга киритишди.

Юнон-рим кураши бўйича миллий жамоа ҳали ҳеч қачон жаҳон чемпионатида умумжамоа ҳисобида кучли учликка кирмаганди. Жамоа ниманинг эвазига бундай натижага эришишди? Уларнинг натижасини муваффақиятли дейиш мумкинми? Бу борада мутахассисларнинг фикри билан қизиқдик.

Юнон-рим кураши бўйича Ўзбекистон миллий жамоаси мураббийлари Нур-Султондаги мусобақадан қониқиш ҳосил қилганликларини айтиб ўтишди. Уларнинг сўзларига кўра, мусобақа бошланишидан аввал Токио олимпиадасига иккита йўлланма қўлга киритиш кутилган, якунда учта йўлланма нақд қилинган.

Мураббийлар жамоанинг турнирдаги натижасига изоҳ беришди.

«Бизда одатда битта медаль бўларди. Ҳали ҳеч қачон кучли учликка кирмаганмиз. Тўғриси, Нур-Султонда иккита йўлланмани мўлжаллагандик ва йигитлар бизни хурсанд қилишди. Нур-Султондаги мусобақага жиддий тайёрландик. Аввало машғулот жараёнига ўзгартириш киритдик. Куч, тезлик, чидамкорликни ривожлантириш учун янги машқлар, янги юкламалар киритилди. 5 марта хорижий йиғинларда бўлдик. Россиялик, кореялик спортчилар билан бирга йиғинларда қатнашдик. Бу йиғинларда курашчиларимиз жаҳон, олимпиада чемпионлари билан курашишди.

Курашчи қанчалик кўп кучли рақиблар билан йиғинларда курашса, шунча фойдали бўлади. Кучли спортчилар билан хорижий йиғинлар доим фойдали бўлган. Федерациямиз айни дамда Россия, Озарбойжон, Грузия билан ҳамкорлик қилмоқда ва бу ҳам ўз самарасини берди. Қизиғи, бу йил Осиёда ҳам, жаҳонда ҳам иккинчи бўлдик»,— дейди миллий жамоа бош мураббийи Равшан Рўзиқулов Kun.uz мухбири билан суҳбатда.

Бирорта олтин олмай қандай иккинчи бўлиш мумкин?

Ўзбекистонлик юнон-рум курашчилари қандай қилиб бирорта олтин медаль олмай умумжамоа ҳисобида иккинчи бўлганига изоҳ берсак. Турнир регламентига кўра, ҳар бир ўринни олган спортчиларга балл берилади ва умумжамоа ҳисоби мана шу баллар ҳисобига шакллантиради. Шу боис Япония ва Грузия миллий жамоалари иккитадан олтин медаль олган бўлса-да, Ўзбекистон умумжамоа ҳисобида иккинчи бўлди.

Россиялик спортчилар 132 балл тўплаб биринчи бўлишди. Ўзбекистон вакиллари 80 балл билан иккинчи, грузиялик спортчилар эса 79 балл билан учинчи бўлишди. Ўзбекистонлик спортчиларнинг аксари юқори босқичларга кўтарилгани учун умумий натижа ижобий бўлган.

Кўпроқ янгиликлар