Тошкент шаҳрининг Сергели тумани ҳокими Нозим Ҳусанов Ўзбекистон Республикаси Бандлик ва меҳнат муносабатлари вазири этиб тайинланади. Kun.uz манбаси хабар қилишича, бугун, 11 сентябрь куни президент Шавкат Мирзиёев раислигида бўлиб ўтган видеоселекторда Нозим Ҳусанов вазир лавозимига тайинланиши ҳақида айтилган.

У бу лавозимда 2018 йилнинг апрелидан 2019 йилнинг августигача ишлаган, 29 августида президент маслаҳатчиси лавозимига ўтган Шерзод Кудбиев ўрнини эгаллайди.

Энди Нозим Ҳусанов номзоди янги амалиётга мувофиқ Олий Мажлис Қонунчилик палатасига тақдим этилади ва депутатлар унинг номзодини маъқуллашганидан кейин президент уни лавозимга тайинлаш тўғрисидаги қарорини имзолайди.

Нозим Ҳусанов 1976 йил Тошкент вилоятининг Зангиота туманида туғилган, 1997 йилда Тошкент автомобиль-йўллар институтини, 2002 йилда Тошкент молия институтини (сиртқи бўлим) тамомлаган.

У 2010—2011 йилларда Марказий банк Тошкент вилояти бош бошқармаси бошлиғи лавозимида фаолият олиб борган, 2011—2013 йилларда Марказий банк раиси ўринбосари, 2013—2014 йилларда Ташқи иқтисодий фаолият Миллий банки бошқаруви раисининг биринчи ўринбосари, 2014—2016 йилларда «Микрокредитбанк» очиқ акциядорлик-тижорат банки бошқаруви раиси бўлган, 2016 йилнинг баҳоридан 2018 йил баҳоригача, Сергели тумани ҳокими лавозимига тайинлангунигача Тошкент шаҳар ҳокимининг иқтисодий ва ижтимоий ривожлантириш, хизматлар соҳаси ва тадбиркорлик масалалари бўйича ўринбосари лавозимида ишлаган.

Маълумот учун, Нозим Ҳусанов яқинда Ўзбекистон Республикаси мустақиллигининг йигирма саккиз йиллиги арафасида президент томонидан «Содиқ хизматлари учун» медали билан тақдирланганди.