Toshkent shahrining Sergeli tumani hokimi Nozim Husanov O‘zbekiston Respublikasi Bandlik va mehnat munosabatlari vaziri etib tayinlanadi. Kun.uz manbasi xabar qilishicha, bugun, 11 sentabr kuni prezident Shavkat Mirziyoyev raisligida bo‘lib o‘tgan videoselektorda Nozim Husanov vazir lavozimiga tayinlanishi haqida aytilgan.

U bu lavozimda 2018 yilning aprelidan 2019 yilning avgustigacha ishlagan, 29 avgustida prezident maslahatchisi lavozimiga o‘tgan Sherzod Kudbiyev o‘rnini egallaydi.

Endi Nozim Husanov nomzodi yangi amaliyotga muvofiq Oliy Majlis Qonunchilik palatasiga taqdim etiladi va deputatlar uning nomzodini ma'qullashganidan keyin prezident uni lavozimga tayinlash to‘g‘risidagi qarorini imzolaydi.

Nozim Husanov 1976 yil Toshkent viloyatining Zangiota tumanida tug‘ilgan, 1997 yilda Toshkent avtomobil-yo‘llar institutini, 2002 yilda Toshkent moliya institutini (sirtqi bo‘lim) tamomlagan.

U 2010—2011 yillarda Markaziy bank Toshkent viloyati bosh boshqarmasi boshlig‘i lavozimida faoliyat olib borgan, 2011—2013 yillarda Markaziy bank raisi o‘rinbosari, 2013—2014 yillarda Tashqi iqtisodiy faoliyat Milliy banki boshqaruvi raisining birinchi o‘rinbosari, 2014—2016 yillarda «Mikrokreditbank» ochiq aksiyadorlik-tijorat banki boshqaruvi raisi bo‘lgan, 2016 yilning bahoridan 2018 yil bahorigacha, Sergeli tumani hokimi lavozimiga tayinlangunigacha Toshkent shahar hokimining iqtisodiy va ijtimoiy rivojlantirish, xizmatlar sohasi va tadbirkorlik masalalari bo‘yicha o‘rinbosari lavozimida ishlagan.

Ma'lumot uchun, Nozim Husanov yaqinda O‘zbekiston Respublikasi mustaqilligining yigirma sakkiz yilligi arafasida prezident tomonidan «Sodiq xizmatlari uchun» medali bilan taqdirlangandi.