Трамп миллий хавфсизлик бўйича маслаҳатчиси Жон Болтонни истеъфога чиқарди

Жаҳон 21:56 / 10.09.2019 18649

АҚШ президенти Дональд Трамп миллий хавфсизлик бўйича маслаҳатчиси Жон Болтонни истеъфога чиқарди. Трамп ўз қарорини Болтоннинг кўп таклифларига қарши бўлгани билан тушунтирган.

«Кеча кечқурун Жон Болтонга Оқ уйда унинг хизматларига бошқа эҳтиёж йўқлигини маълум қилдим. Мен маъмуриятдаги бошқалар каби унинг кўплаб таклифларига қаршиман ва шу сабабли ундан истеъфога кетишни сўрадим», деб ёзган Трамп твиттерда.

АҚШ президентининг таъкидлашича, Болтон унинг илтимосини бажариб, 10 сентябрь эрталаб истеъфога чиқишга ариза ёзган.

Трамп, шунингдек, маслаҳатчисига ҳамкорликда қилинган ишлар учун миннатдорлик билдирган ва миллий хавфсизлик бўйича янги маслаҳатчиси исмини кейинги ҳафтада маълум қилишини айтган.

«Мен истеъфога чиқишимни кеча кечқурун таклиф қилгандим ва президент Трамп буни эртага муҳокама қилишимизни айтганди», деб изоҳ берган вазиятга Болтоннинг ўзи. 

Аввалроқ ОАВда вице-президент Майк Пенс ва Жон Болтон АҚШ делегациясининг «Толибон» етакчилари билан учрашишига қарши эканликлари ёзилганди.

Кейинроқ Трампнинг ўзи толиблар билан музокаралар бекор қилинганини маълум қилган.

Ўз вақтида АҚШнинг БМТ қошидаги махсус вакили бўлган Жон Болтон 2018 йилнинг апрелида президентнинг хавфсизлик масалалари бўйича маслаҳатчиси лавозимини эгаллаганди, у бу лавозимда бир йилга яқин вақт давомида ишлаган Герберт Макмастерни алмаштирганди. Макмастер эса 2017 йилда бу лавозимда бир ойдан камроқ вақт ишлаган (20 январдан 13 февралгача) Майкл Флинн ўрнига келганди.

Кўпроқ янгиликлар