Археологияда сўнгги 200 йилдан бери ўз ечимини кутаётган муаммога ойдинлик киритилди

Ўзбекистон 22:10 / 10.09.2019 29247

Жаҳонга машҳур «Science» журналида «Жанубий ва Ўрта Осиё аҳолисининг шаклланиши» (The formation of human populations in South and Central Asia) номли мақола чоп этилди. Унда Евросиё халқларининг келиб чиқиши билан боғлиқ сўнгги 10000 йиллик тарихига ойдинлик киритилган. Бу ҳақда O‘zRFA ахборот хизмати хабар қилмоқда.

Хабарда айтилишича, тадқиқотда мазкур ҳудудда олиб борилган археологик изланишларда қўлга киритилган 524 та қадимги инсон қолдиқлари (скелетлари) архео-генетик таҳлил қилинган. ДНК-таҳлиллари қилинган қадимий скелетлар қаторида Ўзбекистоннинг олтита археологик ёдгорлигидан топилган инсон қолдиқлари ҳам жой олган.

Мазкур изланишда жаҳоннинг 80 дан ортиқ нуфузли илмий марказларидан 117 нафар тадқиқотчини бирлаштирган. Хусусан, унда ЎзРФА Археологик тадқиқотлар институти археологлари ҳам қатнашган.

ЎзРФА ахборот хизмати хабарида тирик организмларда генетик кодни, яъни ирсий белгиларни сақлаш ва наслдан-наслга ўтказиш вазифасини бажарадиган ДНК (дезоксирибонуклеин кислотаси) инсон суякларида узоқ вақт сақланиб қолиши аниқлаш археологиянинг замонавий йўналиши экани таъкидланган. Бундай тадқиқотлар кенг илмий жамоалар томонидан амалга оширилади, чунки бу изланишлар дала қазишмаси, лаборатория таҳлили ва натижаларни талқин қилиш босқичларини ўз ичига олади.

Ушбу изланиш сўнгги 200 йилдан бери ўз ечимини кутаётган Турон (Ўрта Осиё) ва Шимолий Ҳиндистон аҳолисининг келиб чиқиши муаммосига ойдинлик киритди, дейилган хабарда. Тадқиқот натижаларига кўра, мазкур ҳудуд аҳолисининг шаклланишида Евросиё даштлари аҳолиси асосий ўрин тутган.  

Ушбу иш генетик натижалар археолог ва тилшунос олимлар билан ҳамкорликда ўрганилган илк тадқиқот саналади. Ундаги натижалар, Евросиё бўйича тўпланган қадимий ДНК қолдиқлари Ҳарвард университети лабораториясида таҳлил қилинади.

Маълумот ўрнида айтиш керакки, Science Фанни ривожлантириш Америка ассоциациясининг илмий журнали ҳисобланади. (The American Association for the Advancement of Science — AAAS). Журнал жиддий тақриздан ўтказилади, ҳар ҳафтада бир чоп этилади. Қоғозли варианти 130000, электрон варианти 1 миллион обуначига эга. маркази Вашингтон (Колумбия тумани, АҚШ) ва Кембрижда жойлашган (Буюк Британия). Журнал инглиз тилида чоп этилади.

Кўпроқ янгиликлар