1 октябрдан «Ягона миллий меҳнат тизими» ишга тушади

Ўзбекистон 17:46 / 10.09.2019 12931

2019 йил 1 октябрдан Ўзбекистонда «Ягона миллий меҳнат тизими» ишга туширилиши режалаштирилмоқда. У янги таҳрирдаги «Бандлик тўғрисида»ги қонун асосида йўлга қўйилади. Барча жисмоний ва юридик шахслар учун мутлақо бепул бўлган тизимда электрон меҳнат дафтарчасидан фойдаланиш мумкин бўлади. У ходимнинг тизимга киритиладиган маълумотлари асосида автоматик тарзда шаклланадиган меҳнат фаолияти ҳақидаги ахборотга эга бўлади, дея хабар қилмоқда Kun.uz мухбири. 

Бандлик ва меҳнат муносабатлари вазирининг биринчи ўринбосари Эркин Муҳиддиновнинг «Ўзбекистонда миллий бандлик стратегияси сари йўл» мавзусида ташкил этилган форум доирасида маълум қилишича, «Бандлик тўғрисида»ги қонуннинг янги таҳрири ишлаб чиқилмоқда. Унинг асосида идоралараро дастурий мажмуа бўлган «Ягона миллий меҳнат тизими» ишга тушади. У ижтимоий-меҳнат соҳасида замонавий ахборот технологияларидан фойдаланиш имконини беради. 

Ушбу тизим меҳнат муносабатларини электрон рўйхатга олиш, иш берувчиларнинг штат бирлиги тўғрисида маълумотлар базасини шакллантириш, жисмоний шахсларнинг меҳнат фаолиятига доир маълумотларни электрон меҳнат дафтарчаси кўринишида юритиш, маълумотларни идоралараро тизимли ва доимий равишда алмашиш, ишчи-ходимлар таркиби хусусида холис, шаффоф ва долзарб ахборотни шакллантиришни ҳаётга татбиқ этади. 

Кўпроқ янгиликлар