Спорт соҳасида илмий лабораториялар ва Олимпия тайёргарлик кўриш маркази ташкил этилади

Спорт 14:01 / 05.09.2019 1214

Ўзбекистонда спорт соҳасида илмий лабораториялар ва Олимпия тайёргарлик кўриш маркази ташкил этилади. Бу ҳақда президент Шавкат Мирзиёев раислигида 4 сентябрь куни жисмоний тарбия ва спортни ривожлантириш, халқаро мусобақаларга тайёргарликни кучайтириш масалаларига бағишланган видеоселектор йиғилишида айтиб ўтилди. Бу ҳақда Kun.uz мухбири хабар бермоқда.

«Спортчиларнинг руҳий тайёргарлиги паст бўлса, халқаро мусобақаларида юқори кўрсаткичга эришиши қийин эканлиги, табиий ҳол. Бугунги кунда, республика Олимпия терма жамоалари билан ишлайдиган атиги 21 та спорт врачи, 5 та спорт психологи ва 4 та спорт диетологи бор, холос. Спорт федерацияларининг бирортасида ҳам терма жамоа аъзоларининг мусобақага тайёргарлиги ва тикланиш жараёнини мониторинг қилиш бўйича комплекс лаборатория мавжуд эмас. 

Жисмоний тарбия ва спорт вазирлиги (Набиев), Миллий Олимпия қўмитаси (Шоабдурахмонов), Молия вазирлиги (Қўчқоров) икки ой муддатда спорт федерацияларида илмий-комплекс лабораторияларни ташкил этиш ва молиялаштириш бўйича Ҳукумат қарори лойиҳасини ишлаб чиқсин. Жисмоний тарбия ва спорт вазирлиги (Набиев), Миллий Олимпия қўмитаси (Шоабдурахмонов) бир ой муддатда, спорт психологияси ва диетологияси бўйича илғор ҳисобланган Германия ва бошқа давлатлардан мутахассисларни жалб қилсин.

Токиодан кейинги Олимпия ўйинлари ва йирик халқаро спорт мусобақаларига тизимли тайёргарлик кўриш учун, ривожланган хорижий давлатлар тажрибаси асосида, ягона марказлашган Олимпия тайёргарлик кўриш марказини барпо этиш лозим. Вазирлар Маҳкамаси (Раматов), Жисмоний тарбия ва спорт вазирлиги (Набиев), Миллий Олимпия қўмитаси (Шоабдурахмонов), Қурилиш вазирлиги (Ҳидоятов), Тошкент вилояти ҳокимлиги (Холматов) Бўстонлиқ тумани ҳудудида Олимпия ўйинларига тайёргарлик кўриш марказини қуриш бўйича аниқ таклифларни киритсин», - деди президент.

Кўпроқ янгиликлар