Суперлига тўпурарлари нега терма жамоага чақирилмади? Купер изоҳ берди

Спорт 16:46 / 27.08.2019 41564

Ўзбекистон миллий жамоаси бош мураббийи Эктор Купер ва Терма жамоалар бўлими раҳбари Азиз Ҳайдаров Суперлига тўпурарлари сафида бораётган ҳужумчилар термага чақирилмагани юзасидан изоҳ берди.

Маълумот учун, айни пайтда Ўзбекистон чемпионати тўпурарлари рўйхатини «Пахтакор»нинг сербиялик легионери Драган Черан бошқариб бормоқда. Кучли учликда 11тадан гол урган Ҳумоюн Муртазоев («Насаф») ва Зафар Полвонов (ОКМК) ҳам бор. Аммо бу икки ҳужумчи миллий жамоадан чақирув олган Темурхўжа Абдухолиқов («Локомотив», 10та гол) ва Игорь Сергеев («Пахтакор», 8та гол)дан олдинда бораётганига қарамай ЖЧ-2022 йўлидаги дастлабки ўйин учун йиғинга жалб этилмади.

Tribuna.uz мухбирининг хабар беришича, мазкур ҳолат бугун ЎФАда бўлиб ўтган матбуот анжуманида қизғин савол-жавоблар мавзусига айланган.

– Ҳар бир позиция бўйича қайси футболчиларни энг яхши деб ҳисобласангиз, шуларни термага чақиришингизни айтиб айтдингиз. Айтинг-чи, Суперлига тўпурарлари рўйхатини бошқараётган уч нафар футболчини санаб бера оласизми?

– Ўзбекистон чемпионатидаги барча футболчиларни танийман...

– Полвонов ва Муртазоевларнинг чақирилмагани нима билан боғлиқ?

– Бу – менинг қарорим. Шунга ишонаман.

Image

– Қарорингизни изоҳлай оласизми?

Азиз Ҳайдаров:
– Бу саволга мен жавоб берсам. Кичик мисол келтириб ўтаман – Месси. Натижалари ажойиб, лекин терма жамоада ҳеч қанақа натижаси йўқ. Шу нарсага ҳам эътибор беришингларни хоҳлайман.

Жуда кўп ўйинчилар бор – миллий жамоага келади, лекин ҳеч қанақа... Мен ўзим ҳам, мисол учун, миллий жамоада ўйнаганимда биз термага келишини хоҳлаган, ҳаттоки шу ўйинчиларни чақиринглар, деб мураббийларга айтган янги футболчиларнинг жуда кўпини машғулотларда кўриб, даражаси умуман тўғри келмаслигини тушунардик.

– Ахир Мессини терма жамоага чақиришмоқда-ку, Полвонов ва Муртазоевга эса ҳатто имконият ҳам берилмаяпти.

Эктор Купер:
– Ҳозир бу масалада полемикага киришиш шарт эмас. Оддий нарса: барчанинг ўз фикри, ўз диди бор. Бу – бутун дунёда бор амалиёт. Мессининг ўзига ҳам Аргентина миллий жамоасида, биласиз, жуда ёмон баҳо беришади. Унинг термада қанақа ўйнаши мухлисларга ҳам ёқмайди.

Қайсидир ўйинчи сизга маъқул бўлиши мумкин, лекин у бизнинг баҳолашимиз бўйича... Масалан, қайсидир ҳужумчи ҳақида гапирсак. Клубида яхши ўйнамаётганди-ку, нега чақирилди, дейилиши мумкин. Лекин мен кўряпманки, терма жамоада фойда келтиради. Дунёда бунақа мисоллар жуда кўп. Ҳатто Ўзбекистонда ҳам шундай мисол келтириш мумкин. Ўзининг клубида ўйнамаётган ўйинчи терма жамоада ўйнаяпти.

Мен, албатта, хато гапираётган бўлишим мумкин. Биз бир йилдан буён ишлаяпмиз. Терма жамоа эшиклари барча учун очиқ. Барча учун очиқ. Балки келажакда янги ўйинчилар пайдо бўлиши мумкин, буни кўрамиз, кузатамиз.

Ҳозир менда жуда кўп мисоллар бор, сизларга гапириб беришим мумкин, лекин бу кўп вақтни олади. Тажрибамдан келиб чиққан ҳолда айтишим мумкинки, олдинги ишлаган жойларимда баъзан чемпионат тўпурарини терма жамоага умуман чақирмаганман. Чемпионат тўпурарини! Нимага унақа бўлиши мумкин? Шунақаси бўлиб туради. Бу – мураббий фикри.

Биз барча ўйинчиларни кузатамиз. Барча ўйинчиларни. Мураббийлар билан йиғилиб, ҳамма футболчиларнинг ўйинини таҳлил қиламиз. Сизни тушунаман, менга ишонмаслигингиз мумкин.

– Бу – менинг хоҳишим эмас. Бу – статистика. Улар бошқалардан кўпроқ гол уришди.

– Статистика билан баҳслашиб бўлмайди, дейсиз. Бунақа дейишда эҳтиёт бўлиш керак. Статистикага эҳтиёткорона қараш керак. Футбол компьютер эмас. Статистика бизга фақат маълумот беради, лекин унга бутунлай ишониб қолмаслигимиз керак.

Даврон Файзиев:
– Битта яққол мисол: Осиё чемпионатига Марат Бикмаев асосий ҳужумчи сифатида чақирилган эди. Биринчи ўйинда асосий таркибга киритилган, лекин унинг ўрнига захирадан тушган  Элдор Шомуродов «Ростов»да ўйин амалиёти йўқлигига қарамай, чемпионат қаҳрамонига айланди.

Эктор Купер:
– Яна бир нарсани қўшимча қилмоқчиман. Футбол мавзусида жуда узоқ дискуссия қилиш мумкин. Ҳамма нарсага аргумент топиш... Ўйинчининг ҳолати ҳозир қанчалик яхши, баъзи футболчилар бўйича мендан кўпроқ билишинглар мумкин, лекин энг асосийси – натижа. Ҳаммасини охирида натижа кўрсатади.

Азиз ҳам айтиб ўтди, қайсидир ўйинчи клубида яхшироқ ўйнаб, терма жамоада ўйнай олмаслиги мумкин. Терма жамоанинг системаси клубида зўр ўйнаётган футболчи учун қийинроқ бўлиши мумкин. У ахир тўпурар-ку, дейишингиз мумкин. Ҳа, бўлиши мумкин. Балки, бу футбочлини кейинроқ чақирармиз. Расмий ўйинлар энди бошланади. Келажакда ҳали чақиришимиз мумкин.

Мураббий қайсар инсон бўлса, масалан, Ўзбекистоннинг энг яхши футболчисини чақирмаса-ю, ҳамма ундан шуни сўраса, бу умуман бошқа ҳолат бўлган бўларди. 

Кўпроқ янгиликлар