Эктор Купер: «Бизда ўз ўйин услубимиз бор. Уни ҳадеб ўзгартиравериш яхши фикр эмас»

Спорт 14:50 / 27.08.2019 6758

Навбатдаги Жаҳон чемпионати саралаши олдидан ЎФА анжуманлар залида Ўзбекистон миллий жамоаси бош мураббийи Эктор Купер журналистлар саволларига жавоб берди. Анжуман тафсилотларини Tribuna.uz мухбири келтириб ўтди.

– Ёзда Африка Миллатлар кубогида эксперт бўлиб ишлаб, кейин таътилга чиқиб кетдингиз. Ваҳоланки бу вақтда Суперлига, Ўзбекистон кубоги ва лига кубогида жуда кўплаб ўйинлар бўлиб ўтди.

– Тўғри, мен баъзи ўйинларни ўтказиб юбордим. Лекин таътил бўлмаганида бу ҳам салбий таъсир кўрсатиши мумкин эди. Лекин яхши савол бердингиз. Таътил вақти баъзи ўйинларга тўғри келиб қолди ва биз Лига кубоги ўйинларини ўтказиб юбордик, лекин чемпионатда мен кузата олмаган турлар жуда кам бўлди.

Чемпионатда биринчи давранинг охирги ўйинлари 26-27 июнда (асли 28-29 июнь – таҳр.) бўлиб ўтди ва иккинчи давра 25-26 июлларда (асли 26-27 июль – таҳр) бошланди. Мен 3 августда Ўзбекистонда эдим.

Федерацияда мендан бошқа мураббийлар ҳам кўп – Олимпия ва бошқа терма жамоалар мураббийлари бор. Агар қайсидир муҳим ўйинни ёки ўйинчини кузата олмай қолган бўлсак, уни бошқа мураббийлар кўради. Азиз Ҳайдаровнинг ўзи ҳам кузатади. У келиб менга айтади: «Шундай ўйинчи чиқди, зўр ўйинчи – Ўзбекистоннинг Мессиси, сизлар билмай қолдиларинг». Фақат мен баҳоласам-да, бошқалар маслаҳат бериб туришади.

Бу ҳолат Фаластин билан ўйинга салбий таъсир қиладими, деб ўйламайман. Таътилимнинг ҳеч қандай таъсири йўқ.

Қолаверса, ўтган матбуот анжуманида технологиялар ва шу асосда анализ қилиш ҳақида айтгандим. Бизда барча технологиялар бор. Стадионга бормасдан ўйинларни кўришимиз мумкин. «Стадиондан кўриш барибир бошқа», десангиз, аксинча – бу баъзида яхши. Чунки анализ пайти видеони тўхтатиб, кадрни ортга қайтариб кўришимиз мумкин, стадионда унақа кўра олмайсиз.

Таътилим терма жамоага таъсир қилади, деб ўйлайман. Чунки буни олдиндан баҳолаганмиз. Таътил муддатим бўйича биз танлаган ойни энг мақбули, деган қарорга келганмиз.

– Клублардан ташқари бошқа терма жамоаларни ҳам кузатиб боряпсизми, турли ёш тоифаларидаги терма жамоаларнинг мураббийлари билан кенгашиб иш олиб боряпсизми?

– Миллий жамоа биринчи навбатда олимпия термасидан озиқланади. Тўғри, 14-15 ёшли футболчилардан иборат терма жамоалар ҳам бор, лекин улардаги талаб ҳар хил. Миллий жамоадаги ишни улар қила олмаслиги мумкин. 14 ёшли ва 18 ёшли болани миллий жамоага бир хил тайёрлаб бўлмайди.

Мураббийлар билан кенгашиб тураман. Одатда олимпия терма жамоаси мураббийи билан. Ҳамма мураббийнинг ўз эркинлиги ҳам бор, улар ўз фикри бўйича иш олиб боришади. Директор билан, терма жамоалар мураббийлари билан маслаҳатлашишимиз мумкин, лекин уларнинг ишига аралаша олмаймиз.

Битта нарсадан хотиржам бўлишларингни хоҳлайман: биз ишлаяпмиз, барча ишлаяпти. Ҳамма хотиржам бўлсин. Ўйинчиларни кузатиш бўйича ҳеч қанақа муаммо йўқ.

– Бир йил давомида терма жамоа ўйин услуби ва таркиб ўзаги борасида муайян бир рельсга тушиб олдими?

Image

– Доим барча терма жамоаларнинг ўз йўналиши бўлиши керак. Ҳар хил нарсаларни синаб кўрамиз, баъзилари ўхшайди ва биз буни янада яхшилашимиз керак. Тактика ҳақида гапирсак, 4-3-3 ёки 4-4-2 каби ҳар хил тактикаларни санаш мумкин, лекин буларнинг ҳаммаси нисбий тушунчалар.

Ҳозир ўзимизнинг аниқ йўлимизни топиб олганмиз, аниқ йўналишимиз бор. Аммо шу ҳам ўзимиз хоҳлаган натижани олиб келмаётган бўлиши мумкин. 5 сентябрь куни ўйинимиз бор, лекин барча ўйинчилар 2 сентябрдагина йиғилади. Шунинг учун ҳам ишимизда доим қандайдир муаммолар чиқиб туради, иложи борича сермаҳсул ишлашга ҳаракат қилишимиз керак. Ўйинимизда ҳалигача менга ёқмаётган жиҳатлар бор, масалан.

Танлаган йўналишимизга ўйинчилар ишониши керак, шунда ҳаммаси ўз йўлига тушиб кетади. Шу билан бирга, бу бизга натижа олиб келади, деган аниқ формула йўқ футболда. Ўйинимизни яхшилаш устида доим ишлашимиз керак.

– Тактика танлашда нимага кўпроқ эътибор берасиз, рақибгами ёки футболчиларнинг ҳозирги ҳолатига?

– Аввал ҳам айтгандим, бизни кутиб турган ўйинга қараб тактикага кичик ўзгаришлар киритишимиз мумкин, лекин катта нарсаларни ўзгартира олмаймиз. Шу билан бирга, мана шу кичик ўзгаришлар майдондаги ўйинимизда катта ўзгаришларга сабаб бўлиши мумкин. Доим бир йўналишни ушлашимиз керак, у рақиб билан бундай, буниси билан ундай услубда ўйнаб, услубни тез-тез алмаштирадиган мураббий эмасман.

Тайёргарлик учун беш кун бор, бу вақтда фақат айрим деталларни ўзгартириш мумкин. Ўйин услубимиз умуман бўлмаса – бу муаммо, бизда эса ўз услубимиз бор. Уни доим ўзгартиравериш яхши фикр эмас.

Ҳаммасини футболчилар ҳал қилади, тактика танлашда энг асосийси – улар. Ҳозир қўл остимдаги футболчилардан мамнунман.

– Ўнг қанот ярим ҳимоясида рақобат бироз камдек. Бу позицияда қайси футболчилар кўздан кечирилиб, якунда таркибга киритилмай қолди?

– Рақобат доим бор. Биз ўзимизда бор ресурслардан фойдаланишга мажбурмиз. Асосий ишим шу – энг яхши футболчини танлаб олиб чақириш. Рақобат туфайли таркиб ҳам мунтазам ўзгариб туради.

Қайсидир позицияда муаммо бор десангиз, йўқ, бу муаммо деб айтилмайди. Шу позицияга ўз фикрим бўйича энг яхши футболчини, бор ресурсдан келиб чиққан ҳолда танлашим керак. Бу позицияда яхши ўйинчимиз йўқ, деб ҳеч қачон баҳона қилмайман.

Кўпроқ янгиликлар