Dunyoning eng serdaromad tennischilari reytingi e'lon qilindi 

Shveytsariyalik tennischi Rojyer Federer Forbes nashri talqiniga ko‘ra, qatorasiga 14-marta dunyoning eng serdaromad tennischilari reytingida yetakchilik qilmoqda.

Ma'lum qilinishicha, tennischi 2018 yil 1 iyunidan 2019 yil 1 iyunigacha o‘zi uchun rekord miqdordagi mablag‘ – 93,4 mln dollar ishlab topdi. Bu qiymatga musobaqalardan olingan mukofot pullari (7,4 mln dollar) hamda homiylik shartnomalari va reklama uchun gonorarlar (86 mln dollar) kirgan.  

Keyingi o‘rinlarni serbiyalik Novak Jokovich (50,6 mln dollar), yaponiyalik Key Nisikori (37,3 mln dollar) va ispaniyalik Rafael Nadal (35 mln dollar) egallamoqda. 5-o‘rinni amerikalik ayol tennischi Serena Uilyams (29,2 mln dollar) egallab, u shuningdek ayol tennischilar orasida eng serdaromad tennischi bo‘ldi. 

“Federer, Jokovich va Nadal 2004 yildan boshlab “Katta dubulg‘a”ga kiruvchi 63 ta musobaqadan 53 tasi, jumladan oxirgi 11 tasida g‘alaba qozongan. Kortda hukmronlik qilish ushbu uchlikka umumiy hisobda 373 mln dollar mukofot puli keltirgan va buning evaziga ular o‘z hamkasblarini ko‘p yorug‘lik yillariga ortda qoldirishgan”, deyilgan nashrda. 

Yetakchi o‘ntalikka, shuningdek, yaponiyalik ayol tennischi Naomi Osaka (24,3), Germaniya vakillari Aleksandr Zverev (11,8) va Anjyelika Kerber (11,3), ruminiyalik Simona Xalep (10,2) va amerikalik Sloan Stivens (9,6) kirgan.

Umumiy hisobda yetakchi o‘ntalikdan joy olgan tennischilar 312 mln dollar ishlab topishgan, bu esa 2018 yildagiga nisbatan 23 foiz ko‘proqni tashkil qilgan.