Поп туманида «Namangan agro logistic» марказининг очилиш маросими бўлиб ўтди

Иқтисодиёт 15:00 / 11.06.2019 4937

Бугунги кун талаби деганда нимани тушуниш мумкин? Ҳар бир соҳада бу иборани турлича талқин этса бўлади. 

Мамлакатимизда турли жабҳалар, айниқса, аграр соҳада янгича иш юритишни ривожлантиришга бўлган аниқ ва самарали ҳаракатлар кузатилмоқда. Кундан-кун жадаллашиб бораётган бозор коньюктураси нафақат ички бозорни, балки юртимизда ишлаб чиқарилган маҳсулотлар экспорт салоҳиятини оширишни талаб қилаётир.

Наманган вилояти азалдан сархил мевалари билан машҳур. Вилоятда етиштирилган боғдорчилик маҳсулотларига чет элларда ҳам талаб жуда катта. 

Поп туманида замонавий услубда мевани сақлаш, саралаш, қуритиш, музлатиш, қадоқлаш ва маҳсулотни чет элга экспорт қилишга мўлжалланган «Namangan agro logistic» маркази иш бошлади. 8 июнь куни мазкур марказнинг тақдимот ва очилиш маросими тантаналари бўлиб ўтди.

Мазкур комплексни Поп туманида барпо этилиши бежиз эмас. Попга қўшни бўлган Чуст, Бувайда туманларида 10 минг гектардан зиёд боғлар мавжуд.

2018 йили Президентимиз Шавкат Мирзиёев Наманган вилоятига ташрифи давомида Поп туманидаги «Namangan agro logistic» қишлоқ хўжалиги маҳсулотларини сақлаш, қайта ишлаш ҳамда иссиқхона ташкил этиш лойиҳалари тақдимоти ҳам ўтказилиб, президентимиз мазкур лойиҳани қўллаб-қувватлаган эди. Президентимизнинг эътиборлари билан ташаббускорлар томонидан тақдим этилган логистика марказига 10 гектар ер майдони ажратилиб, 70,8 млрд. (шундан, ташаббускор “Поп-импэкс» МЧЖ ўз маблағлари ҳисобидан 17,6 млрд. сўм, ҳамда “Асакабанк” кредити ҳисобидан 53,2 млрд.)сўм сарфланди.

Айни пайтда «Namangan agro logistic»да 3 200 тонна мева ва сабзавотларни сақлаш учун газ тизимида бошқариладиган музлаткич комплекси (омбор) ҳамда Италиянинг ЮНИТЕК фирмасининг соатига 6 тонна олма, шафтоли, ўрик, соатига 2 тонна гилос меваларини саралаш ҳамда қадоқлаш технологик линиялари, замонавий 10 тонна мева концентрати ишлаб чиқариш комплекти ўрнатилди. 4 гектар жойда малиназор ташкил этилиб, бу йил мева ҳосили олина бошланди. 

Марказда 250 нафар маҳаллий аҳоли вакиллари иш билан таъминланади.  

«Namangan agro logistic»нинг тантанали очилиш маросимида Наманган вилояти ҳокими Хайрулло Бозоров, “Ўзбекозиқовқатхолдинг” холдинг компанияси мутасаддилари, ҳамкор ташкилотлар вакиллари иштирок этди.

“Наманган вилоятида етиштириладиган мева маҳсулотларига хориж давлатларида талаб йилдан йилга ўсиб бормоқда. Поп туманида ташкил этилган логистик марказда соатига 6 тонна олма, шафтоли, ўрик ва соатига 2 тонна гилос маҳсулотларини саралаш ҳамда қадоқлаш имкониятлари мавжуд.

 “Ўзбекозиқовқатхолдинг” холдинг компанияси томонидан мазкур корхонага дастгоҳларни стандарт асосида ўрнатиш, ишлатишда техник регламентларга риоя қилиш бўйича амалий ва назарий ишлар олиб борилди. Шунингдек, корхона томонидан қайта ишланадиган, қадоқланган маҳсулотларнинг ички ва ташқи бозорларида ўз ўрнини эгаллаш учун амалий ёрдам кўрсатиб келинмоқда”, дейди "Ўзбекозиқовқатхолдинг" ХК раис ўринбосари Азмиддин Қамбаров.           

KUN.UZ мухбири: Элмурод Эрматов

Кўпроқ янгиликлар