Диққат: тез ёрдам машинаси! Ёки Тошкент ҳайдовчилари нега йўл беришмади?

Жамият 19:11 / 15.05.2019 64282

Сир эмас, халқимиз фаровонлиги ошгани сайин, шаҳар ва қишлоқларимиз кўчалари янада серқатнов бўлиб, автомобиллар ҳаракати кўпайиб бормоқда. Бу эса, ҳайдовчилардан янада ҳушёр ва атрофида бўлаётган жараёнларга эътиборлироқ бўлишни талаб қилади.

Айниқса, куннинг эрталабки ва кечки тиғиз вақтларида, ҳайдовчиларга ҳам осон эмас. Бироқ ҳаётда баъзан шундай ҳолатлар бўладики, қанчалик шошаётган бўлсангиз ҳам, ортингизда келаётган автомашинага йўл беришингиз қонун томондан талаб этилса, инсонийлик жиҳатидан зарурат ҳисобланади. 

Гап, тахмин қилганингиздек, фавқулодда чақирув орқали ҳаракатланаётган ёнғин хавфсизлиги, патрул ёки тез тиббий ёрдам машиналари ҳақида бормоқда.

Кун.уз таҳририяти мамлакатимизнинг бош ва энг тирбанд шаҳри бўлган Тошкентда тез ёрдам машинасига йўл беришда ҳайдовчиларимиз қанчалик аҳил ва ҳамжиҳат ҳаракатланишига ойдинлик киритиш мақсадида ижтимоий лойиҳага қўл урди.

Бунда Ўзбекистон Соғлиқни сақлаш вазирлиги, Тошкент Шаҳар ИИББ Йўл ҳаракати хавфсизлиги бошқармаси билан ҳамкорлик қилинди.

Видео: YouTube

Видео: Mover (tas-ix)

Лойиҳа вақтида тез ёрдам машинаси милтилловчи ёруғлик ва товушли ишораларини ёқиб чорраҳага яқинлашиб келаётганига қарамай, айрим ҳайдовчилар бунга эътибор бермади. Қайрилиб олиш жойларида ҳам ҳайдовчилар транспорт воситаларини тўхтатиш чораларини кўришмади.

Гувоҳ бўлганимиз ҳолатларга мутахассисларнинг қараши қандай? Тез ёрдам бўлими ходими, ҳайдовчиси ва Йўл ҳаракати хавфсизлиги бошқармаси вакили ўз фикрларини билдирди. Даставвал, махсус транспорт воситаларига йўл бериш масаласи қонунчиликда қандай тартибга солингани хусусида.

«Йўл ҳаракати қатнашчилари Йўл ҳаракати хавфсизлиги тўғрисидаги қонунни, йўл ҳаракати қоидаларини билишлари керак ва йўл ҳаракати давомида ўша қонун ва қоида талабларига риоя қилишлари лозим. Ушбу қонун-қоидалар транспорт воситалари ҳайдовчилари ва пиёдалар учун бирдек амалда ва кучда. Амалдаги ЙҲҚнинг 25-27-бандларида тўсқинликсиз ҳаракатланадиган транспорт воситаларининг имтиёзлари белгилаб берилган. Булар, тез тиббий ёрдам, ёнғин хавфсизлиги ва ички ишлар идораларининг махсус транспорт воситаларидир.

Ушбу транспорт воситаларининг ҳайдовчилари кечиктириб бўлмайдиган вазифаларини бажараётган вақтда йўл қоидаларида белгиланган айрим талаблардан четга чиқишлари мумкин. Ушбу транспорт воситалари яқинлашиб келаётганда, йўл ҳаракатининг бошқа қатнашчилари уларни тўсқинликсиз ўтказиб юбориш шартлиги белгилаб берилган. Бу йўл қатнов қисмида ҳаракатланаётган пиёдаларга ҳам тегишли.

Мабодо, махсус имтиёзга эга автомобиллар товушли ва ёруғлик ишоралари билан ҳаракатланаётганда вақтда ўтказиб юборилмаса, Маъмурий жавобгарлик тўғрисидаги Кодекснинг http://lex.uz/docs/97664 1255-моддаси, 1-қисмида жавобгарлик назарда тутилган. Унга биноан, транспорт воситалари ҳайдовчилари, тўсқинликсиз ҳаракатланиши зарур бўлган транспорт воситаларини ўтказиб юбормайдиган бўлса, энг кам иш ҳақининг 5 баравари миқдорида жарима солинишига сабаб бўлади», - деди майор Шодмон Сапаров.

Шодмон Сапаров

Унинг қайд этишича, ҳайдовчилар йўл қатнов қисми чизиқларига қатъий амал қилишса, йўлларда ҳар қандай вақтда ҳам тирбандликларнинг олдини олиш имкони сақланиб қолинар эди.

«Бу борада, айтиб ўтишим мумкинки, транспорт воситалари ҳайдовчилари, йўл қатнов қисми чизиқлар билан белгиланган кўчаларда ўша чизиқлар оралиғида ҳаракатланишлари ЙҲҚда ҳам белгилаб қўйилган. Агар, ҳайдовчилар қатъий равишда чизиқлар орасида ҳаракатланишса, ўтказиб юборилиши зарур бўлган автомобиллар келиб қолган тақдирда, уларни ўтказиб юбориш учун имконият кенг бўлади. Бугунги кунда, жуда кўп ҳолларда, йўл қатнов қисмининг бир ҳаракатланиш йўлагида биттадан ортиқ автомобиллар ҳаракатланиш ҳолатлари кузатилади. Бу эса, йўлларда асоссиз тирбандликларга сабаб бўлади», - дея таъкидлади ЙҲХБ катта инспектори Сапаров.

16 йилдан буён тез ёрдам кўчма бригада шифокори бўлиб ишлаб келаётган Алишер Алимов йўллардаги тирбандликлар туфайли ўлим билан боғлиқ ҳолатлар рўй бергани хусусида сўзлар экан, тиғиз вақтларда ҳайдовчилар тез ёрдам машиналарига йўл бермаслик ҳолатлари кўп кузатилишини таъкидлади.  

Алишер Алимов

«Бир сафар Жарариқдан бир беморни Ⅰ-шаҳар клиник шифохонасига келтираётганимизда, дарвоза олдида жон берди. Бунақа оғир ҳолатда ҳар бир дақиқа ғанимат ҳисобланади. Беморга қанчалик тезроқ зарурий муолажа кўрсатилса, унинг ҳаётини сақлаб қолиш имконияти ошади, – дейди Алишер ака. – Йўлларда ҳайдовчиларимизнинг ишимизни сифатли ва ўз вақтида бажаришга халақит берадиган ҳоллар кўп бўлади. Оддий мисол, чорраҳаларни бўшатишмайди ёки йўл беришмайди. Айниқса, тиғиз пайт дейдиган вақтларда ҳайдовчилар эътиборсизлик туфайлидир балки, тез ёрдам машиналарига йўл беришмайди. Бунинг оқибатида манзилга етиб бориш имконияти чекланади».

Хўш, тез ёрдам машинаси ҳайдовчиси транспорт воситаларини бошқариб кетаётганларнинг ҳатти-ҳаракатларини қандай баҳолайди?

Тошкент шаҳар Соғлиқни сақлаш бошқармаси, Юнусобод тумани 11-сонли Тез тиббий ёрдам бўлими ҳайдовчиси Низом Иброҳимов бу хусусда ўз фикрлари билан ўртоқлашди.

Низом Иброҳимов

«Тошкент шаҳар аҳолисидан бир нарсани илтимос қилардимки, йўлларда махсус имтиёзга эга автомобилларга эътиборлироқ бўлишсин. Тўғри охирги вақтлар йўл берадиганлар ҳам кўпайиб қолган. Чорраҳаларда навбатчиликда турган ЙПХ ходимлари ҳам тез ёрдам машиналари яқинлашаётганда чорраҳани бўшатишга ҳаракат қилишади. Аммо, йўл-транспорт ҳодисасига учраган оғир аҳволдаги фуқароларни оламиз, баъзида йўл бермайдиганлар ҳам учраб турибди. Олдимизга ўтиб тормоз педалини босади. Қайрилиб олишимизда қаршидан келаётган автомобиллар ҳам кўпинча йўл бермайди.

Товушли ва чироқли ишораларимиз ёниб турган чоғда ҳам йўлни бўшатишмайди. Шу каби эътиборсиз ҳайдовчилардан тез ёрдам машиналарига йўл беришларини илтимос қилардим. Бу ҳаёт, иссиқ жон, билиб бўлмайди, балки ўша одамнинг уйига кетаётгандирмиз.

Шундай ҳоллар ҳам бўлганки, шошиб кетаётганимизда айрим ҳайдовчилар олдимизга тушиб “ўйин” қилиб кетишади. Ахир, оғир аҳволдаги, ҳаёт билан курашаётган кишига ҳар бир сония, дақиқа ғанимат.

Яна бир нарса. Тез ёрдамни чақирганлар ҳам бизларнинг ўзимизга боғлиқ бўлмаган ҳолатлар сабабли кечикишимизни тўғри тушунсинлар. Фавқулодда ҳолатларда бизлар ҳам имкон даражасида тезроқ етиб боришга ҳаракат қиламиз. Аммо, чорраҳаларда йўл беришмаса, устига ҳайдаб кета олмаймиз. Кечикиб қолсак, бизларга қаттиқ сўзлар қилишади.

Бугунги кунда ҳайдовчиларнинг бир-бирига нисбатан ҳурматсизлиги жуда кучайиб кетган. Бу нарса, чорраҳаларда, ҳаракатланиб кетаётганингизда, орқадан келиб товушли ишора беришлари, ўтиб кетишга уринишларида кузатилади. Олиб кетаётган беморнинг аҳволи оғирлашиб қолса, шифокор машинани четга олишни сўрайди. Ортда келаётган транспорт воситалари ўнгга ўтишимизга йўл бермайди. Шифокор эса, ёрдам кўрсатиши керак. Яна бир марта мурожаат қилардимки, ҳайдовчилар сабрлироқ бўлишса, йўл чизиқларига риоя қилишса, тирбандликлар ҳам бўлмасди», - дейди Низом ака.

Хуллас, Тошкент шаҳрида тез ёрдам машиналарига йўл бериш билан боғлиқ аҳвол гувоҳи бўлганингиздек. Йўл берганлардан йўл бермайдиган ҳайдовчилар кўп назаримизда. Бу муаммони муолажа қилиш учун эса, жуда кўп нарса талаб қилинмайди. Балки, ҳайдовчи ва пиёдалар атрофида юз бераётган воқеа-ҳодисаларга эътиборлироқ, сабрлироқ бўлиш ва бошқа ватандош тақдирига бефарқ бўлмасалар кифоя. Бундан ташқари, ҳайдовчилар белгиланган йўл чизиқларига риоя қилишса ҳам олам гулистон бўлар эди. Чунки, йўл чизиқлари шундай фавқулодда ҳолатларни эътиборга олинган ҳолда кенгроқ чизилади.

Толиб Раҳматов Kun.uz мухбири
Фазлиддин Абдуқодиров оператор
Муҳаммаджон Ғаниев оператор   

Кўпроқ янгиликлар