Бўстонлиқ туманига олиб борувчи айрим йўлларда ҳафта давомида автомобиль ҳаракати тўхтатилади

Ўзбекистон 17:00 / 22.04.2019 11243

Ўзбекистон Республикасида жорий йилнинг 22 апрелидан 28 апрель кунига қадар велосипед спортининг шоссе йўналиши бўйича Осиё чемпионати бўлиб ўтади. Ушбу чемпионатда Осиё қитъасидаги 40га яқин давлатлардан 500 нафарга яқин велопойгачилар иштирок этади.

Осиё чемпионатини юқори савияда ўтказиш ва мусобақа иштирокчиларини хавфсизлигини таъминлаш мақсадида Тошкент вилоятининг Бўстонлиқ туманига олиб борувчи бир қатор йўллари ҳафта давомида соат 07:00 дан 18:00га қадар ёпилади.

23-24-25-26 апрель кунлари соат 07:00 дан 18:00га қадар 22 км.лик масофада велоспорт ўтказилиши муносабати билан 4Р12 “Бектемир-Чирчиқ-Ғазалкент-Чорбоғ қўрғони” автомобиль йўлининг 32 км дан 62 км.ларигача бўлган қисмида автомобиль ҳаракати вақтинчалик тўхтатилади.

27 апрель куни соат 07:00 дан 18:00га қадар “International Hotel Tashkent” меҳмонхонасидан старт олган велопойгачиларнинг хавфсизлигини таъминлаш мақсадида 4Р12 “Бектемир-Чирчиқ-Ғазалкент-Чорбоғ қўрғони” автомобиль йўли тўлиқ ва 4Р10 “Чорбоғ сув омбори ҳалқа йўли” нинг 61 км.гача (Сижжак қишлоғигача) бўлган автомобиль йўлида автомобиль ҳаракати вақтинчалик тўхтатилади.

28 апрель куни 4Р12 “Бектемир-Чирчиқ-Ғазалкент-Чорбоғ қўрғони” автомобиль йўлининг 62 км.гача бўлган қисмида ва 4Р6 “Тошкент-Чирчиқ-Чимён” автомобиль йўлининг 54 км.дан 76 км.гача (Билдирсой дам олиш масканигача) бўлган масофадаги қисмида автомобиль ҳаракати вақтинчалик тўхтатилади.

Шу муносабат билан Бўстонлиқ туманига дам олиш мақсадида борувчи ҳайдовчиларга 4Р6 “Тошкент-Чирчиқ-Чимён” автомобиль йўли (Чирчиқ шаҳри орқали)орқали ҳаракатланиш тавсия этилади.

Тошкент вилояти ИИБ ЙҲХБ Матбуот гуруҳи

Кўпроқ янгиликлар