Каттақўрғонда туман ҳокими ўринбосари жавобгарликка тортилишига сабаб бўлган низо давом этади. Тадбиркор ҳақми?

Жамият 17:14 / 18.04.2019 16942

Сўнгги вақтларда маҳаллий ҳокимлик ва тадбиркорлар ўртасида турли низо ва тушунмовчиликлар юзасидан таҳририятга мурожаатлар кўпаймоқда. Вазиятга ойдинлик киритиш мақсадида ўтказилган журналистик суриштирувлар жараёнида тадбиркор маҳаллий ҳокимлик мутасаддиларини айбласа, ҳокимлик тадбиркорнинг ўзини айбдор қилади.

Kun.uz сайтига навбатдаги шундай мазмундаги мурожаат Каттақўрғон туманида фаолият юритаётган тадбиркор Элёр Қодировдан келди.

«Мен 2018 йил апрель ойида тадбиркорлик фаолиятимни кенгайтириш мақсадида Каттақўрғон туман ҳокимияти ёнида жойлашган истироҳат боғидан музқаймоқ ва салқин ичимликлар савдоси билан шуғулланишга мўлжалланган павильон қуриш учун ер майдони ажратишини сўраб туман ҳокимига мурожаат қилганман. Мурожаатим натижасиз қолгани сабабли туман ҳокимининг қурилиш масалалари бўйича ўринбосари Н.Санақуловга учрашганимда, у мен сўраган жойдан ер ажратиб бериш учун 100 миллион сўм пул талаб қилди. Шундан сўнг мен Самарқанд вилояти ҳокимига шахсан учрашиб, масала ва муаммоларни тушунтирганимдан кейин у кишининг ёрдами билан туман ҳокимлиги юқорида айтилган манзилда ер ажратиб беришди. Мен туман ҳокимлиги томонидан талаб қилинган ҳужжатларни тайёрлаганимдан сўнг уларнинг рухсати билан қарорда кўрсатилган майдонда қурилиш ишларини бошладим. Қурилиш жараёнида туман ҳокими шахсан ўзи келиб, қурилиш ишларига баҳо бериб, қўшимча ер майдонига йўлак қилишимни, темир чамбараклар ўрнатиб, гулхона қилишимни ва манзарали дарахтлар экишимни, келин-куёвлар учун алоҳида қўшимча жой қуришимни тайинлаб, топшириқ берди. Туман ҳокими бу топшириқ ижроси юзасидан телефон қилиб, эслатиб ҳам турди. Мен туман ҳокими томонидан берилган топшириқларни бажариб, замонавий павильонни қуриб битказдим. Аммо бугунги кунда туман ҳокимияти мутасаддилари келиб, «қарорда кўрсатилган муддатда шартнома тузмагансан, сен қонунга зид равишда ўзбошимчалик билан қўшимча ер майдонига қурилиш қилгансан», деган важ билан қарорни бекор қилишларини, мен қурган павильонни бузиши ёки кимошди савдосига қўйиб, сотиб юборишларини айтиб, менга босим ўтказишаяпти. Менинг айбим туман ҳокими ўринбосарига 100 миллион сўм бермаганимми?», – дейилади мурожаатда.

Ушбу мурожаатни жойида ўрганиб, тадбиркор билан суҳбатлашдик. Элёр Қодиров юқорида ёзилган эътирозларини айтар экан, қарорда кўрсатилган муддатда шартнома тузганини ва ўзбошимчалик эмас, балки туман ҳокими топшириғи асосида қўшимча ер майдонига қурилиш қилганини таъкидлади.

Ўрганишимиз давомида масалага тегишли ҳужжатлар билан ҳам танишдик. Маълум бўлишича, Каттақўрғон тумани ҳокимининг 2018 йил 20 августдаги «Фуқаро Қодиров Элёр Маматқул ўғлига павильон сифатида фойдаланиб, аҳолига хизмат кўрсатишни ташкил этиш учун вақтинча фойдаланишга 0,02 га ер майдонини ижарага бериш тўғрисида»ги 1520-қ-сонли қарори билан тадбиркорга ижара асосида ер ажратиб берилган.

Тадбиркор шу қарор асосида замонавий павильонни қуриб битказган ва унинг таъкидлашича, туман ҳокимининг топшириғига кўра, қўшимча қурилишни ҳам амалга оширган. Энди айнан шунинг учун муаммога дуч келмоқда.

Вазиятга ойдинлик киритиш ва тадбиркорнинг эътирозлари юзасидан изоҳ олиш мақсадида Каттақўрғон туман ҳокими Аъзамхон Баҳромов билан учрашдик.

«Биз дастлаб, бу тадбиркорни тўлиқ қўллаб-қувватлаганмиз. Аммо у истироҳат боғида спиртли ичимлик ҳисобланган пиво сотгани гувоҳи бўлдим. Бир неча марта огоҳлантирдим. Қолаверса, ўзбошимчалик билан қўшимча қурилишларни қилиб олди. Албатта, бу бўйича ўз эътирозларимизни айтдик. Аммо шундан кейин унинг бизга нисбатан шикоятлари кўпайди. Вилоят раҳбарининг сайёр қабулида менга кўп туҳмат гапларни айтди. Ҳозир ҳам турли ташкилотларга шикоят қилиб, ўзига тегишли бўлмаган масалаларда бизга очиқчасига туҳмат қилмоқда. Ер ажратиб берилгандан кейин қарорда кўрсатилан муддатда ижара шартномаси ҳам тузмаган. Биз бу масаланинг барча қонуний чораларини кўрамиз. Суд орқали ҳал қиламиз», – дейди туман раҳбари.

Шундан кейин табдиркорнинг мурожаатлари қайд этилган шикоятларга ойдинлик киритдик.

Хўш, ҳақиқатан ҳам туман ҳокимининг қурилиш масалалари бўйича ўринбосари Н.Санақулов ер ажратиш учун тадбиркор айтганидек, ундан 100 миллион сўм талаб қилганми?

Туман ҳокими А.Баҳромовнинг таъкидлашича, унинг ўринбосари бу маблағни ободонлаштириш мақсадлари учун сўраган. Маълум бўлишича, бу ҳолат юзасидан суд қарори ҳам чиққан.

Туман ҳокимлиги юристи К.Аҳмедов бизга суд ҳужжатларини тақдим этди. 2018 йил 5 сентябрда Каттақўрғон маъмурий судининг очиқ мажлисида муҳокама этилган маъмурий иш юзасидан суд қарорида қайд этилишича, Н.Санақулов Ўзбекистон Республикаси МЖтКнинг 241-4-моддаси (Назорат қилувчи, ҳуқуқни муҳофаза қилувчи ҳамда бошқа давлат органининг ва давлат ташкилотининг мансабдор шахси ёки хизматчиси томонидан тадбиркорлик субъектларини пул маблағлари ҳамда бошқа моддий қимматликларни ажратиш билан боғлиқ ҳомийликка ва бошқа тадбирларга мажбурий жалб этиш) билан айбли деб топилган. Суд қарори билан унга жарима жазоси тайинланган. Суд тадбиркордан маблағ талаб қилингани ҳолатини ҳақиқатан ҳам ободонлаштиришга ҳомийлик қилиш учун сўралган деб топган.

Тадбиркор шикоятида туман ҳокимлиги мутасаддилари «қарорда кўрсатилган муддатда шартнома тузмагансан, сен қонунга зид равишда ўзбошимчалик билан қўшимча ер майдонига қурилиш қилгансан», деган важ билан қарорни бекор қилишларини, мен қурган павильонни бузиши ёки кимошди савдосига қўйиб, сотиб юборишларини айтиб, менга босим ўтказишяпти», дея ёзиб ўтган. Туман ҳокими билан суҳбатимизда ҳам шу ҳақда эслатилди.

Ҳақиқатан ҳам тадбиркор туман ҳокими қарорида белгиланганидан ташқари қўшимча ер майдонида қурилиш қилганми?

Айнан шу масалалар тадбиркорнинг Самарқанд вилояти ҳокимига мурожаатидан сўнг вилоят адлия бошқармаси бошлиғининг биринчи ўринбосари Ҳ.Хўжамқулов ва бошқа мутасаддилар иштирокида ўрганиб чиқилган. Бу ҳақда тузилган далолатнома мазмуни билан танишдик. Тадбиркор имзо қўймаган далолатномада «туман ҳокими қарорининг 3-бандига асосан бир ой муддатда ижара шартномаси тузилмагани, тадбиркор томонидан ноқонуний равишда ўзбошимчалик билан 1 сотих ер майдони эгалланиб, тегишли тартибда рухсат олмасдан қўшимча қурилиш ишлари олиб боргани сабабли шартномани бекор қилиш тўғри таклиф» экани ёзилган.

Қарорнинг 3-бандида ер 10 йилга ижарага берилгани ва 1 ойда ижара шартномаси тузилмаса, мазкур қарор ўз кучини йўқотиши қайд этилган.

Аслида ижара шартномаси ҳақиқатан тузилмаганми? Ўрганишимиз давомида маълум бўлишча, туман ҳокимлиги ва тадбиркор ўртасида ижара шартномаси 2018 йил 5 сентябрда тузилган. Ижара шартномасида тадбиркор ва туман ҳокими Аъзамхон Бахромовнинг имзоси турибди. Туман ҳокими қарори эса 2018 йил 20 августда қабул қилинган. Демак, қарорнинг 3-банди бу ҳолатда тадбиркор томонидан бузилмаган. Мазкур ижара шартномаси 2018 йил 5 сентябрда туман ер ресурслари ва давлат кадастри бўлимидан 1135-сон тартиб рақами билан рўйхатдан ўтказилган. Ижара шартномаси суратларида бунга гувоҳ бўлиш мумкин.

Тадбиркор қарорда белгиланганидан ташқари 1 сотих жойга қурилган ноқонуний қурилишни туман ҳокимининг топшириғи билан амалга оширганини, ўзбошимчалик билан эгалланган, дейилаётган жойга павильон учун фақат кириш йўлаги қургани, қолган жойини ободонлаштириб қўйганини айтмоқда.

Бу низода ким ҳақ? Биз бу ерда қайсидир томоннинг ёнини олиш фикридан йироқмиз. Шикоят асосида туман ҳокимлиги ва тадбиркор ўртасидаги низони холис ўргандик.

Kun.uz вилоятдаги масъул мутасаддилар ушбу низони тез орада ҳал этишига ишонч билдиради ва лозим бўлса, бу мавзуга яна қайтади.

Бардошбек САМАД ўғли,
Kun.uz мухбири

Кўпроқ янгиликлар