Ўзбекистонда Давлат қарзини бошқаришнинг ўрта муддатли стратегияси ишлаб чиқилади

Иқтисодиёт 08:39 / 17.04.2019 5430

2019 йилнинг 1-11 апрель кунлари Ўзбекистон Республикаси Молия вазирлигига «Давлат қарзини бошқаришнинг ўрта муддатли стратегияси»ни ишлаб чиқиш доирасида Жаҳон банки ва Халқаро валюта жамғармасининг техник кўмаклашиш бўйича қўшма миссияси ташриф буюрди.

Миссиянинг асосий мақсади Ўзбекистон Республикаси Молия вазирлигига ўрта муддатда бозор муносабатларига асосланган молиялаштиришга ўтиш, «Давлат қарзини бошқаришнинг ўрта муддатли стратегияси»ни ишлаб чиқишга кўмаклашиш орқали унинг таҳлилий имкониятларини ошириш ҳамда маҳаллий қарз бозорини ривожлантириш бўйича кўмаклашишдир. 

«Давлат қарзини бошқаришнинг ўрта муддатли стратегияси» ҳукуматнинг харажат ва хатар ўртасидаги танловига асосланиб, давлат қарзи портфелининг ўрта муддат учун шакллантирилишини назарда тутади.

Техник кўмак доирасида миссия аъзоларининг Ўзбекистон Республикаси Молия вазирлиги раҳбарияти, вазирликнинг тегишли бошқарма бошлиқлари, Ўзбекистон Республикаси Марказий банки ҳамда тижорат банклари (Миллий банк, Ўзсаноатқурилиш банки ва Ипотека банк) вакиллари билан учрашувлари бўлиб ўтди. 

Ташриф давомида миссия аъзолари, Молия вазирлигининг «Давлат суверен, корпоратив (банк) қарз мажбуриятлари ва давлат қарзи» бошқармаси ва «Халқаро молиявий муносабатлар» бош бошқармалари мутахассислари билан биргаликда, зарур макроиқтисодий, фискал ва давлат қарзига оид маълумотларни шакллантирдилар. 

Шу билан бирга, миссия вакиллари томонидан Ўзбекистон Республикаси Молия вазирлигининг «Давлат суверен, корпоратив (банк) қарз мажбуриятлари ва давлат қарзи» бошқармаси ходимлари учун «Давлат қарзини бошқаришнинг ўрта муддатли стратегияси»ни ишлаб чиқиш бўйича семинар тренинглар ўтказилди.

Тренинг якуни бўйича, таҳлиллар ва турли ҳил макроиқтисодий сценарийлардан келиб чиқиб, Ўзбекистон Республикаси учун ўрта муддатда давлат қарзини бошқаришнинг тўрт ҳил стратегияларининг бирламчи лойиҳалари ишлаб чиқилди.

Келгусида, мазкур бирламчи лойиҳалар асосида Молия вазирлиги томонидан Ўзбекистон Республикаси учун Давлат қарзини бошқаришнинг ўрта муддатли стратегиясини ишлаб чиқиш кўзда тутилган, дейилади вазирлик хабарида.

Кўпроқ янгиликлар