Туркия билан ҳамкорликда Бухоро вилоятида  ИЭС қурилади

Иқтисодиёт 22:59 / 20.03.2019 11836

Ўзбекистонда Туркиянинг «Cengiz Enerji Sanayiive Ticaret A.Ş.» компанияси билан ҳамкорликда қуввати 240 МВт бўлган комбинациялашган иссиқлик электрстанциясини қуриш режалаштирилмоқда. Kun.uz мухбири Ўзбекистон Республикаси Энергетика вазирлиги Матбуот хизматидан олинган маълумотга асосланиб, шу ҳақида хабар берди. 

Ўзбекистон Республикаси Энергетика вазири Алишер Султонов «Cengiz Holding» компанияси таъсисчиси ва бошқаруви раиси Меҳмет Женгиз бошчилигидаги делегация билан учрашди.

Учрашув якунига кўра, Энергетика вазирлиги ва «Cengiz Energy» компанияси ўртасида қуввати 240 МВт бўлган ИЭС қурилишини лойиҳасини давлат-хусусий шерикчилик асосида қуришга доир битим имзоланди.

Комбинациялашган иссиқлик электр станцияси қуриладиган жой сифатида Бухоро вилоятининг Когон туманидаги Қуйимозор сув омбори яқинидаги ҳудуд танланган. 

Табиий газда ишловчи иссиқлик электрстанцияси GE (АҚШ) да ишлаб чиқарилган газ турбинаси ва Siemens (Германия) компаниясида тайёрланган буғ трубинасини ўз ичига олади. 

“Ўзбекистон Республикасининг Бухоро вилоятида қуввати 240 МВт бўлган ИЭС қуриш лойиҳасини амалга ошириш” бўйича битим жорий йилнинг 19 февраль куни Энергетика вазирлиги ва «Cengiz Enerji Sanayiive Ticaret A.Ş.» компанияси ўртасида имзоланган эди.

Таъкидлаш жоизки, Бухоро вилоятида қуввати 240 МВт га тенг бўлган иссиқлик электр станциясини қуриб фойдаланишга топширилиши мазкур ҳудудда электр энергиясига бўлган эҳтиёжни қондириш билан бирга магистраль электр тармоқлари орқали энергия етказиб беришда йўл қўйиладиган техник йўқотишларни камайтиришга хизмат қилади.

Кўпроқ янгиликлар