Маданият вазири ўринбосари: Тупроққалъа бўйича кўрсатма берган одам жавобгарликка тортилади

Ўзбекистон 12:28 / 15.03.2019 25550

Қорақалпоғистон ҳудудида жойлашган Тупроққалъа маданий объектида ёлланма ишчилар томонидан қурилиш ишлари олиб борилаётганлиги ҳақида ижтимоий тармоқларда хабарлар тарқалган эди. Мазкур ҳолат бўйича Маданият вазири ўринбосари Камола Оқилова Kun.uzʼга берган интервьюсида муносабат билдирди.

─ Тупроққалъадаги қурилиш ишлари эндигина бошланган экан. Кеча бу ҳақида хабарлар чиқиши биланоқ ишлар ўз жойида тўхтатилди.

Маданий объектлар билан ишлашда яхлит тизимнинг мавжуд эмаслиги кўп ҳолларда панд беряпти. Биз ҳар бир объектни илмий-методик кенгаш муҳокамасидан ўтказишга ҳаракат қиляпмиз. Лекин маҳаллий инспекция яна ўзбошимчалик билан иш олиб борган. Бу иш учун кўрсатма берган одамни аниқлаштиришга ҳаракат қиляпмиз. Бу шахс, албатта, тегишли тартибда жавоб беради. Яхшиликча тушунтирганда ходимлар тушунмаяптими, энди бундай ҳолатларга қатъий чора кўрмасак бўлмайди.

Оқиловага кўра, Тупроққалъа каби бутун жаҳонга танилган шаҳарчанинг консервация қилиниши жуда муҳим масала, вазирлик бунинг аҳамиятини жуда яхши тушунади.

«Реставрация, консервация билан шуғулланадиган ташкилотлар бизга авваламбор ўз лойиҳасини тақдим этиши керак. Мана объектнинг илгариги, ҳозирги ва реставрациядан кейин бўлиши кутилаётган аҳволи, деб режасини кўрсатсин», — дея таъкидлади вазир ўринбосари.

Маданият вазири ўринбосари Камола Оқилова

Маълумот учун, Тупроққалъа милодий 3-4 асрларда замонавий Ўзбекистон ҳудудида қад ростлаган шаҳар қалъаси ҳисобланади.

Ҳозирги Беруний шаҳри атрофидаги ҳудудида жойлашган тарихий майдон 1938-1950 йилларда Хоразм археология-этнография экспедицияси томонидан ўрганилган. Тупроққалъадан жун, шойи, ип газлама парчалари, бўйра, рангли гилам, ҳайкал бўлаклари, сопол буюмлар ва Кушон давлатига тегишли тангалар топилган. Қалъа суғориш иншоотларининг бузилиши, ҳарбий тўқнашувлар натижасида харобага айланган.

Кўпроқ янгиликлар