Халқ банки янги интерактив хизматларни таклиф этади

Иқтисодиёт 19:51 / 13.03.2019 5943

Ўзбекистон миллий матбуот марказида 13 март куни Халқ банки томонидан “Ўзбекистон Республикаси Президентининг 2018 йил 23 мартдаги “Банк хизматлари оммабоплигини ошириш бўйича қўшимча чора-тадбирлар тўғрисида”ги Қарори ижроси таҳлили ва бу борада белгиланган чора-тадбирлар” мавзуида матбуот анжумани бўлиб ўтди.

Матбуот анжуманида Халқ банки томонидан йўлга қўйилаётган замонавий банк хизмат турлари, тармоқда амалга оширилаётган янгиликлар ҳақида маълумот берилди.

Ўтган давр мобайнида Халқ банкининг 197 та филиалдан 185 тасида “Банк хизматлари марказлари” фаолияти ташкил этилиб, унга асосан Front ва Back офисга ажратилган ҳолда хизмат кўрсатиш ташкил этилди.

Шунингдек, ривожланган мамлакатлар тажрибасини ўрганган ҳолда синов тариқасида Тошкент шаҳри Амалиёт бўлими ва Шайхонтоҳур филиалида “24/7 электрон офис”лар ташкил қилинди. Яна қўшимча равишда жорий йил давомида 20 та “24/7 электрон офис” ишга тушириш режалаштирилган.

Мижозларга янада қулайлик яратиш мақсадида “Интернет банкинг”, “Корпоратив Мобил банкинг” ва “Xalq mobile” каби турли интерактив хизмат турлари жорий этилмоқда.

Шу билан бирга туристлар кўпроқ борадиган жойларда “24/7” ёки куну-тун режимида ишлайдиган 11 та автоматлаштирилган валюта айирбошлаш шохобчалари ташкил этилди. Халқаро “Visa” тўлов карталарини очиш 2019 йилнинг 1 апрелига қадар - бепул этиб белгиланди ва депозит суммаси 25 АҚШ доллардан 15 АҚШ долларига туширилди.

Яна бир муҳим масала. Марказий банк томонидан берилган кўрсатмага асосан Халқ банки валюта айирбошлаш шохобчаларида бир хорижий давлатнинг нақд валютасини бошқа хорижий давлатнинг нақд валютасига алмаштириш (конверсия) операцияси йўлга қўйилган.

Анжуман қизғин бахслар ва мунозараларга бой ўтди. Кредит олиш, пенсия ва нафақа пулларини аҳолига етказиш тизими ҳамда омонат турлари бўйича саволлар, фикр-мулоҳазалар билдирилди. Журналистлар томонидан берилган саволларга мутасаддилар атрофлича жавоб беришди. 

Кўпроқ янгиликлар