Бангладеш бизнес маркази президенти: «Ўзбекистонда ҳамон болалар меҳнатидан фойдаланилади деб ўйлашади»

Иқтисодиёт 19:37 / 13.03.2019 6650

Кўп йиллар давомида Ўзбекистонда пахта монокультураси, унда мажбурий ва болалар меҳнатидан фойдаланиш каби ҳолатлар ўзбек пахтаси, ундан ишлаб чиқарилган маҳсулотларга нисбатан бир неча давлатларнинг бойкотига сабаб бўлиб келди.

Kun.uz мухбири кийим-кечак экспорти соҳасида кўп йиллик тажрибага эга бангладешлик мутахассис Меҳди Маҳбуб билан иқтисодиёт, тўқимачилик саноати, тадбиркорлик ва маркетинг масалалари бўйича суҳбатлашди.

Видео: Mover (tas-ix)

Видео: Youtube

«Мен хусусий тадбиркорман ва бу саволга жавоб беришни афзал биламан. Ўз давлатимни севаман, шундай экан, ҳақиқатни айтишдан қўрқмайман, чунки мамлакатимдаги инсонлар холис фикрнинг қадрига етади.

Бангладешда кийим-кечак, тўқимачилик соҳасида болалар меҳнатидан фойдаланилмайди. Бундан воз кечганимизга йигирма йилдан кўпроқ муддат бўлди.

Кийим-кечакларни ўзимиз учунгина эмас, бутун дунё учун ишлаб чиқарамиз. 130дан ортиқ мамлакат Бангладеш экспорт қиладиган кийим-кечакларнинг харидори саналади. Иқтисоди ривожланган давлатлар учун инсон ва болалар ҳуқуқлари энг қадрли жиҳатлардан ҳисобланади. Биз уларнинг қадриятларини ҳурмат қилишимиз зарур. Акс ҳолда биз муваффақиятли ва барқарор бўла олмаймиз. Ўтган асрнинг 90-йилларида Бангладеш саноати ҳукумат ва халқаро ҳамкорлар кўмаги билан болалар меҳнатидан озод қилиниши бошланган. 

Ўзбекистон бу салбий тамғадан қутулгани билан ҳукуматингиз ва сизни қутлайман.

Бироқ Ўзбекистон ҳақида ахборот жуда танқис. Мен Ўзбекистон ҳақида жуда кам нарса биламан, бу ерга ҳам айнан шу мақсадда – маълумот йиғиш учун келдим.

Меҳди Маҳбуб

Афсуски, менинг мамлакатимдаги саноат етакчилари Ўзбекистонда ҳамон болалар меҳнати билан боғлиқ муаммолар бор деб ўйлайди ва давлатингизни қора рўйхатга киритишган.

Сиз бу соҳада кўпроқ тарғибот, брендинг ва мулоқотга эътибор қаратишингиз зарур», дейди Бангладеш бизнес маркази президенти Меҳди Маҳбуб пахта саноатида болалар меҳнатидан фойдаланиш ҳолатлари учраши ҳақидаги саволга жавобан.

Халқаро меҳнат ташкилоти (ХМТ) мониторингида айтилишича, Ўзбекистоннинг аксар пахта далаларида мажбурий меҳнатга батамом барҳам берилган. 2018 йилда пахта теримига жалб этилганларнинг 93 фоизи ихтиёрий равишда пахта терган. Талаба, ўқитувчи, врач ва ҳамширалар пахта теримига мутлақо жалб этилмаган. Шунга қарамай, кузатувчиларнинг қайд этишларича, айрим ҳолатларда давлат ташкилот ва идоралари ходимлари пахтага чиқарилиб, теримда иштирок этгани кузатилган.

Ўтган йилларда пахта теримида катта муаммо деб эътироф қилинган болалар меҳнатидан фойдаланишга эса буткул барҳам берилган.

Эслатиб ўтамиз, 2018 йилнинг сентябрь ойида АҚШ Ўзбекистон пахта маҳсулотларини болалар меҳнати орқали етиштирилган маҳсулотлар рўйхатидан чиқарганди. АҚШ Меҳнат вазирлиги Халқаро меҳнат ишлари бюроси тайёрлаган ҳисоботда Ўзбекистон, Бразилия ва Парагвай ҳукуматлари болалар меҳнати, мажбурий меҳнатнинг ҳар қандай шаклига қарши муросасиз курашга чоғлангани алоҳида эътироф этилганди.

Маълумот учун, Халқаро меҳнат ташкилотига кўра, дунёдаги ҳар 10 нафар боланинг бири турли кўринишдаги меҳнатга жалб этилади ва бу сон 152 миллиондан ошган. Мажбурий меҳнатнинг турли шакллари билан ҳисоблаб чиқилганда, жаҳонда 25 миллион бола меҳнатга мажбурланади.

Суҳбат «Ўзтўқимачиликсаноат» уюшмаси билан ҳамкорликда ташкил этилди

Кўпроқ янгиликлар