Жозеф Вотел: АҚШ Марказий ва Жанубий Осиёда шериклари суверенитетини мустаҳкамлашда ҳамкорлик қилади

Ўзбекистон 14:44 / 21.02.2019 4845

АҚШ Қуролли Кучлари Марказий қўмондонлиги қўмондони генерал Жозеф Вотел 21 февраль куни пойтахтдаги «Hyatt Regency Tashkent» меҳмонхонасида Марказий ва Жанубий Осиё мамлакатлари Бош штаб бошлиқларининг навбатдаги анжумани якунлари бўйича баёнот берди, деб хабар бермоқда Kun.uz мухбири. 

«Марказий ва Жанубий Осиё мамлакатлари Бош штаб бошлиқларининг навбатдаги анжуманини ўтказишдаги кўмаги учун Ўзбекистон Президент Шавкат Мирзиёев ва Ўзбекистон Мудофаа вазирлигига ўз миннатдорчилигимни билдираман. АҚШ Қуролли Кучлари Марказий қўмондонлиги анжуман доирасида ҳамкорлик қилаётган Ўзбекистон Марказий ва Жанубий Осиё минтақасида хавфсизликни таъминлаш ва барқарорликка эришишда муҳим рол ўйнайди. 

Шунингдек, минтақада барқарорликни сақлаш учун таҳдидларга қарши кураш ҳамда минтақавий хавфсизлик масалаларида ҳамкорлик қилишга тайёр барча анжуман иштирокчиларидан миннатдорман.

АҚШ мазкур минтақада конструктив йўллар орқали шериклари суверенитети ва барқарорликни таъминлаш учун ҳамкорликни ривожлантириш ва мустаҳкамлашдан қайтмайди», — дейди АҚШ қўмондони.

Жозеф Вотелнинг таъкидлашича, Мирзиёев шахсан анжуман ишига қизиқиш билдирган ва минтақавий хавфсизликни таъминлаш йўлида ҳамкорлик қилиш бўйича ўз мулоҳазаларини билдирган. 

АҚШ Қуролли Кучлари Марказий қўмондонлиги қўмондони генерали, шунингдек, лавозимига янги тайинланган Ўзбекистон Мудофаа вазирига ҳам омад тилаб, анжуманни ўтказишга кўмак берган меҳмондўст ўзбек халқига миннатдорчилик билдирди.

Кўпроқ янгиликлар