Қозоғистон Тошкентга газ транзитида пул ишлашни бошлади

Ўзбекистон 15:08 / 20.02.2019 16405

Тошкентга Қозоғистон орқали транзит билан газ етиб келишни бошлади. Бу ҳақда Қозоғистон энергетика вазири Канат Бозумбаев айтиб ўтди, дея хабар қилмоқда LS.

2018 йил охирида «Ўзтрансгаз» ва «КазТрансГаз» биринчи марта Қозоғистон ҳудуди орқали табиий газни Тошкент шаҳри истеъмолчиларини таъминлаш учун етказиб бериш бўйича келишув имзолади.

Келишув шартларига кўра, Қозоғистон ҳудуди орқали Ўзбекистон газининг 1 миллиард куб метри етказиб берилиши керак.

Бозумбаевнинг сўзларига кўра, ушбу келишувлар натижасида шу йил қишда жанубий минтақаларнинг газ таъминотида узилишларга йўл қўйилмади.

«Январь ойида биз тарихда биринчи марта Тошкент газ таъминоти учун транзит тақдим этдик. Бу бизнинг газ-транспорт тизимларимиз имкониятидан тўлиқ фойдаланишга эшик очиб берди. Транзит тарифлар 1 минг куб метрга 2,9 долларни ташкил этади, бу тенг асосда, сабаби Қозоғистон ҳам ўз жанубини ўзбек транзити орқали таъминлайди», - дея таъкидлаб ўтди у.

Аввалроқ, транзит ташувлар «Газли-Чимкент» ва «Бухоро газли тумани - Тошкент - Бишкек - Олмаота» магистрал газ қувури орқали амалга оширилиши маълум бўлганди.

Кутилишича, Қозоғистон ҳудуди орқали газ транзити Тошкентга қишки мавсумда энергетика мувозанатини таъминлайди. 

Эслатиб ўтамиз, аввалроқ Қозоғистон Ўзбекистонга нефть етказиб беришга тайёрлиги, бироқ ҳозирча инфратузилма йўқ экани хабар қилинганди.

Кўпроқ янгиликлар