Ko‘p yillik tanaffusdan so‘ng, O‘zbekiston Tojikiston shimolidagi ayrim shaharlar va tumanlarga elektr energiya yetkazib berishni boshladi. Bu haqda ASIA-Plus Tojikiston energetika va suv resurslari vaziri Usmonali Usmonzodaga asosan xabar bermoqda.

Har kuni Konibodom shahri, Spitamen tumani va So‘g‘d viloyatining ayrim chegaraoldi aholi punktlari O‘zbekistondan 3 mln kVt/s. elektr energiya olmoqda.

«O‘z navbatida, qishki sovuqlar kelishi bilan O‘zbekiston janubi Tojikistondan kuniga 17 mln kVt/s. elektr energiyasini olyapti», - deya ta'kidlab o‘tdi vazir.

Shuningdek, uning ma'lum qilishicha, 2019 yil apreldan oktabr oyigacha Tojikiston O‘zbekiston janubiga 2 mlrd kVt/s. elektr energiya eksport qilishni rejalashtirmoqda, bu o‘tgan yilga nisbatan 800 mln kVt/s.ga ko‘p.

Tojikiston parlamenti 2018 yilda Tojikiston hukumati va Osiyo taraqqiyot banki o‘rtasida «Tojikiston energetika tarmoqlarini Markaziy Osiyo energiya tizimiga qayta ulash» loyihasi bo‘yicha imzolangan bitimni ratifikatsiya qildi.

Loyihani amalga oshirish uchun Osiyo taraqqiyot banki grant sifatida 35 mln dollar ajratdi. Bu mablag‘lar Tojikiston energetika tarmoqlarini O‘zbekiston va Qirg‘iziston energiya tizimlari bilan sinxronlashtirish hamda tarmoqning rele himoyasini yaratishga sarflanadi.

Eslatib o‘tamiz, avvalroq Tojikiston O‘zbekistondan tabiiy gaz importini to‘rt barobarga oshirishi xabar berilgandi.