Ўзбекистон Тожикистонга электр энергияси экспорт қила бошлади

Иқтисодиёт 11:35 / 31.01.2019 12901

Кўп йиллик танаффусдан сўнг, Ўзбекистон Тожикистон шимолидаги айрим шаҳарлар ва туманларга электр энергия етказиб беришни бошлади. Бу ҳақда ASIA-Plus Тожикистон энергетика ва сув ресурслари вазири Усмонали Усмонзодага асосан хабар бермоқда.

Ҳар куни Конибодом шаҳри, Спитамен тумани ва Сўғд вилоятининг айрим чегараолди аҳоли пунктлари Ўзбекистондан 3 млн кВт/с. электр энергия олмоқда.

«Ўз навбатида, қишки совуқлар келиши билан Ўзбекистон жануби Тожикистондан кунига 17 млн кВт/с. электр энергиясини оляпти», - дея таъкидлаб ўтди вазир.

Шунингдек, унинг маълум қилишича, 2019 йил апрелдан октябрь ойигача Тожикистон Ўзбекистон жанубига 2 млрд кВт/с. электр энергия экспорт қилишни режалаштирмоқда, бу ўтган йилга нисбатан 800 млн кВт/с.га кўп.

Тожикистон парламенти 2018 йилда Тожикистон ҳукумати ва Осиё тараққиёт банки ўртасида «Тожикистон энергетика тармоқларини Марказий Осиё энергия тизимига қайта улаш» лойиҳаси бўйича имзоланган битимни ратификация қилди.

Лойиҳани амалга ошириш учун Осиё тараққиёт банки грант сифатида 35 млн доллар ажратди. Бу маблағлар Тожикистон энергетика тармоқларини Ўзбекистон ва Қирғизистон энергия тизимлари билан синхронлаштириш ҳамда тармоқнинг реле ҳимоясини яратишга сарфланади.

Эслатиб ўтамиз, аввалроқ Тожикистон Ўзбекистондан табиий газ импортини тўрт баробарга ошириши хабар берилганди.

Кўпроқ янгиликлар