2019 yil 25 yanvar kuni O‘zbekiston Respublikasi Hisob palatasida “Yevrosement grup” kompaniyasi prezidenti – Mixail Skoroxod rahbarligidagi delegatsiya bilan uchrashuv bo‘lib o‘tdi. Uchrashuvda kompaniya tomonidan O‘zbekiston Respublikasida amalga oshirilayotgan investitsiya loyihalari muhokama qilindi.
"Yevrosement grup" dunyoda beshta yirik sement korxonalaridan biri bo‘lgan xalqaro sanoat xoldingidir. Rossiya, Ukraina va O‘zbekistonda 19 sement zavodini, shuningdek beton, temir-beton mahsulotlarini ishlab chiqarish zavodlarini va noruda materiallar konlarini birlashtiradi. Xolding korxonalari bir yilda 60 mln tonnadan ortiq sement, 11 mln. tonnadan ortiq beton mahsulotlarini ishlab chiqarish quvvatiga ega, noruda materiallar zaxiralari 5,5 mlrd. tonnani tashkil qiladi.
Uchrashuv davomida investor tomonidan to‘g‘ridan-to‘g‘ri investitsiyalar asosida amalga oshirilayotgan va O‘zbekiston Respublikasi prezidentining 2018 yil 3 noyabrdagi PQ-3997-sonli “O‘zbekiston Respublikasi va Rossiya Federatsiyasi o‘rtasidagi ikki tomonlama strategik hamkorlik va ittifoqchilik munosabatlarini yanada kengaytirish chora-tadbirlari to‘g‘risida”gi qarori bilan tasdiqlangan quyidagi loyihalarga oid ustuvor masalalar ko‘rib chiqildi:
Toshkent viloyatidagi “Ohangaronsement” OAJ bazasida yillik ishlab chiqarish quvvati 3 mln. tonnalik yangi sement ishlab chiqarish liniyasini barpo etish (qiymati 160 mln. AQSh dollari);
Toshkent shahridagi “Qurilish materiallari va konstruksiyalari” zavodini rekonstruksiya qilish, beton buyumlar, refrakter g‘ishtlari va issiqlik izolyatsiyasi materiallarini ishlab chiqarishni tashkil etish (qiymati 40 mln. AQSh dollari).
2020-2022 yillarda O‘zbekiston sement bozorining potensial hajmi kompaniya tomonidan 15-18 mln tonna miqdorda baholanmoqda. Shu bilan birga respublika energiya tejamkor texnologiyalarni joriy etish bo‘yicha MDH mamlakatlari o‘rtasida yetakchilardan biri hisoblanadi ("quruq usul"da sement ishlab chiqarish ulushi 50 foizdan ortiq) va ishlab chiqarish quvvatlaridan foydalanishning eng yuqori (95-97%) darajasiga ega.
Yig‘ilish davomida "Yevrosement grup" kompaniyasining rahbari qurilish-montaj ishlari belgilangan muddatlarda yakunlanishini tasdiqlab, ishlab chiqarish obektlari 2020-2021 yillarda foydalanishga topshirilishini, shuningdek qurilish muddatlarini qisqartirish borasida kompaniya tomonidan qator tadbirlar amalga oshirilayotganligini ta'kidlab o‘tdi.
