Абдулазизхон мадрасаси бўйича расмий муносабат билдирилди

Ўзбекистон 21:12 / 21.01.2019 15754

Яқинда Kun.uz'да Абдулазизхон мадрасасининг бугунги кундаги аҳволи тўғрисида мақола эълон қилинганди. Журналист Саодат Абдураҳмонова мадраса нега ҳозирги таъмирталаб аҳволига келиб қолгани борасида шартли саволни ўртага ташлаган бўлиб, бунга «эътиборсизлик, консервация ва обидаларни қайта таъмирлаш ишлари бўйича мутахассисларда кўникма, билим етишмаслиги» сабаб бўлаётганини баён этган

Бунга жавобан Маданий мерос объектларини муҳофаза қилиш ва улардан фойдаланиш илмий-ишлаб чиқариш бош бошқармасининг Бухоро ва Навоий вилоятлари бўйича минтақалараро давлат инспекцияси​дан берилган хабарга кўра, Вазирлар Маҳкамаси ҳузуридаги алоҳида муҳим ижтимоий, маданий ва тарихий аҳамиятга эга бўлган объектларни қуриш, реконструкция қилиш ва мукаммал таъмирлаш дирекцияси маблағлари ҳисобидан, Абдулазизхон мадрасасида 2019 йилда таъмир ишларини ишлари амалга ошириш режалаштирилган.

Маълум қилинишича, Вазирлар Маҳкамасининг 2018 йил 9 июндаги «ЮНЕСКОнинг умумжаҳон мероси рўйхатига киритилган Ўзбекистон Республикасидаги ҳудудларни муҳофаза қилиш тўғрисида»ги қарорининг 4 ва 9-бандларига мувофиқ, Умумжаҳон мероси рўйхатига киритилган Бухоро тарихий қисми алоҳида муҳофаза этиладиган ҳудуд сифатида эътироф этилиб, унда режалаштирилган барча қурилиш ва ободонлаштириш ишларининг лойиҳалари ЮНЕСКОнинг Умумжаҳон мероси маркази ва Ўзбекистон Республикаси Маданият вазирлиги билан белгиланган тартибда аввалдан келишилган ҳолда амалга оширилиши шарт. 

«Бухоро тарихий маркази ва унинг муҳофаза ҳудудидаги барча капитал қурилиш ишлари, уларнинг лойиҳалари Умумжаҳон мероси маркази томонидан маъқуллангунга қадар тўхтатилиши белгилаб қўйилганлиги сабабли таъмирлаш ишларини олиб бориш вақтинчалик тўхтатилган.

ЮНЕСКОнинг Умумжаҳон мероси маркази халқаро экспертларидан иборат олимлар томонидан Эски шаҳардаги обидаларни  тадқиқ этиш ишлари бошланган. Изланишлар натижаси бўйича белгиланган тартибда ўзларининг хулосаларини бериши кўзланган.

Юқоридагиларни инобатга олган ҳолда, халқаро экспертлар хулосалари ҳамда Умумжаҳон мероси маркази томонидан  лойиҳалар маъқулланганидан кейин Абдулазизхон мадрасасида  таъмир ишлари давом эттирилишини маълум қиламиз», – дейилади хабарда.

Маълумот учун, Абдулазизхон мадрасаси 2008 йил 9 октябрда Бухоро вилояти ҳокимининг қарори билан Моддий маданий мерос объектлари давлат рўйхатига олинган. Иншоот Аштархонийларнинг бешинчи вакили Абдулазизхоннинг буйруғи билан меъмор Мимхоқон ибн Хўжа Муҳаммадамин томонидан 1652 йилда қурилган.  Мадраса XVII аср Бухоро меъморчилигининг етук намунасидир.

Кўпроқ янгиликлар