Apple kompaniyasi sentabrda taqdim qilingan yangi iPhone XS va XS Max smartfonlari sotuvga chiqqandan keyin sotilishi to‘xtatilgan iPhone X smartfonlarini yana ishlab chiqara boshladi.
The Wall Street Journal nashrining yozishicha, kompaniyaning iPhone X’ni yana sotuvga chiqarishi yangi avloddagi ayfonlarga talab pastligi va Apple’ning Samsung oldidagi majburiyatlari bilan bog‘langan. Samsung kompaniyasi Apple smartfonlari uchun OLED-ekranlarni yetkazib beradi va kelishuvda ma'lum miqdordagi displeylarni yetkazib berish ko‘zda tutilgan.
Avvalroq Apple yangi modellari – iPhone XS, XS Max va arzonroq modeli XR’ga buyurtmalar olishni qisqartirishi ma'lum qilingan. Buning o‘rniga Apple o‘tgan yilgi iPhone 8 va 8 Plus modellari uchun buyurtmalar olishni ko‘paytirgan. 2017 yilda taqdim qilingan bu smartfonlar iPhone XR’dan 20 foiz arzonroq turadi.
