“Soyuz-FG” raketa-tashuvchi “Progress MS-10” yuk kemasi bilan Xalqaro koinot stansiyasi tomon Boyqo‘ng‘irdagi kosmodromdan start oldi. Ushbu parvoz bu turdagi raketalar uchun 11 oktabrdagi avariyadan keyin birinchisi bo‘ldi. 

Rossiyaning parvozlarni boshqarish markazi yuk kemasi raketaning 3-pog‘onasidan ajralib, XKS tomon parvozni davom ettirganini ma'lum qilgan. 

Yuk kema XKS bilan 18 noyabrda tutashishi kerak. Kema stansiyaga 2,5 tonna turli yuk, jumladan, yonilg‘i, suv va siqilgan gaz yetkazadi.

Ushbu yuk kema 30 oktabrda uchishi kerak bo‘lgan, biroq “Soyuz-FG” avariyasidan keyin parvoz 16 noyabrga ko‘chirilgan. Raketa 11 oktabrda kosmodromdan uchirilgandan ko‘p o‘tmay avariyaga uchragandi. Falokat oqibatida raketada bo‘lgan fazogirlar Aleksey Ovchinin va Nik Xeygga hech narsa qilmagan. Ta'kidlanishicha, bu 35 yil ichidagi ilk favqulodda vaziyat bo‘lgan.