Қорақалпоғистондаги «самосуд»га алоқадорларнинг барчаси ушланди

Ўзбекистон 09:00 / 05.08.2018 52465

2 август куни ижтимоий тармоқларда Қорақалпоғистоннинг Беруний туманидаги «Шоббоз» деҳқон бозорида ўғриликда гумонланган шахснинг арқон билан қўлларидан бозор кириш дарвозаси устунига осиб қўйилган ҳолати видеоси тарқатилганди.

Ўзбекистон ИИВ 2 август куни 1 август куни рўй берган ушбу ҳодиса бўйича расмий ахборот бериб, Д.Н.нинг қўлидан осиб қўйган У.А.га нисбатан ЖЧнинг 229-моддаси (Ўзбошимчалик) билан жиноят иши қўзғатилгани маълум қилинди.

Қорақалпоғистон Республикаси Ички ишлар вазирлиги ҳузуридаги Тергов бошқармаси томонидан берилган қўшимча маълумотга кўра, тергов жараёнида фуқаро Д.Н.ни қўлларини арқон билан боғлаб, бозорнинг кириш дарвозаси устунига осиб қўйган фуқаро У.А. билан Х.С., Х.Ғ. ва М.Ш. ҳам бўлгани аниқланиб ушланди.

Суриштирув жараёнида У.А., Х.С. ва М.Ш. ўз жиноий ҳаракатларини содир этишга вояга етмаган шахсни ҳам жалб қилишгани маълум бўлди. Ҳолат юзасидан Жиноят кодексининг 127-моддаси (Вояга етмаган шахсни ғайриижтимоий хатти-ҳаракатларга жалб қилиш), 138-моддаси (Зўрлик ишлатиб ғайриқонуний равишда озодликдан маҳрум қилиш), 277-моддаси (Безорилик) ва 229-моддаси (Ўзбошимчалик) билан жиноят иши қўзғатилиб, тергов ҳаракатлари давом эттирилмоқда. Ушбу моддалар бўйича айбланаётган шахслар учун жаримадан тортиб бир неча йилгача озодликдан маҳрум этиш жазолари тайинланиши мумкин.

Кўпроқ янгиликлар