Rossiya Davlat dumasining «Yedinaya Rossiya» partiyasidan deputati va «Vedomosti» nashrining parlamentdagi sobiq muxbiri Natalya Kostenko Feysbukdagi o‘z sahifasida o‘ziga Telegram’dan yozmaslikni so‘radi, sababi u ushbu servis ishlamayotganini aytgan. 

Ushbu xabarga qoldirilgan izohlardan biri esa Rossiya hukumati rahbari Dmitriy Medvedevning matbuot kotibi Natalya Timakova tomonidan yozildi. Timakova VPN’dan foydalanishni maslahat bergan.

Timakovaning izohi OAV e'tiborini tortgach, yozuv Kostenkoning sahifasidan yo‘qolib qoldi. Biroq, Timakova ertasi kuni jurnalist Oleg Kashinning sahifasidagi izohlarda «deputat bilan hazillashgani»ni yozib qoldirdi.

Eslatib o‘tamiz, Roskomnadzor 16 apreldan Rossiyada Telegram’ni bloklamoqda. Messenjer bloklashni chetlab o‘tish uchun muntazam manzilini o‘zgartirmoqda: buning uchun Amazon Web Services, Google Cloud, Microsoft Azure va boshqa bulutli xizmatlar IP-adreslarini qo‘llamoqda. Shundan keyin Roskomnadzor bu provayderlarning IP-adreslarini ommaviy bloklashni boshlagan.