Instagram yangiliklar lentasida postlar namoyishiga odatiy yondashuvini o‘zgartiradi. Bu haqida ijtimoiy tarmoqning rasmiy blogida ma'lum qilindi. Ta'kidlanishicha, yangicha yondashuv foydalanuvchilarga eng dolzarb kontentlarni ko‘rish imkonini beradi. 

"Bugun biz "Yangi postlar" tugmasini ishga tushirdik. U sizga qaysi payt lentani yangilash borasida mustaqil qaror chiqarish imkonini beradi. Shu tugmaga bossangiz, lenta tepasidagi oxirgi kontentga kirasiz, bosmasangiz - lentani ko‘ra boshlagan paytingizdagi postlarni kuzatishda davom etasiz", - deyiladi xabarda.

Ijtimoiy tarmoqda yangicha yondashuv Instagram foydalanuvchilarini xursand qilishiga umid bildirishdi.

Shuningdek ishlab chiquvchilar yana bir o‘zgartirish kiritishga qaror qilishdi, unga ko‘ra, yaqinda yuklangan postlar yuqorida ko‘rsatiladi. "Bu sizning yangiliklar lentangiz doim dolzarbligicha qolishi uchun qilingan, siz ham o‘zingiz uchun ahamiyatli bo‘lgan postlarni o‘tkazib yubormaysiz", - deyishdi ijtimoiy tarmoqda.