Ўзбекистонга келувчи тожикистонликлар хорижий паспортга эга бўлишлари керак бўлади

Жаҳон 00:05 / 14.03.2018 13088

Тожикистон ташқи ишлар вазирлиги Тожикистоннинг Ўзбекистонга ташриф буюришни истовчи фуқаролари буни фақатгина амал қилувчи хорижий паспортлари бўлгандагина амалга ошира олишларини маълум қилди.

Ўзбекистон Республикаси Президенти Шавкат Мирзиёевнинг Душанбега 9-10 март кунларидаги ташрифи якунларига кўра икки давлат фуқароларининг ўзаро ташрифлари бўйича ҳукуматлараро келишув имзоланган. Бу келишув икки давлат фуқароларининг қўшни давлатда 30 кунгача виза олмаган ҳолда бўлишларини кўзда тутади.

“ОАВда бу келишув амал қилиши бошлангани ҳақидаги хабарлар тарқалгани ва чегарадаги ўтказиш пунктларида фуқароларга ноқулайликлар туғилмаслиги учун Тожикистон ташқи ишлар вазирлиги ушбу келишувни қўллаш учун томонлар ўз давлатлари ичидаги жараёнларни якунлашлари зарурлигини тушунтиради”, деб айтилган Тожикистон ташқи ишлар вазирлиги сайтида 

Вазирликнинг таъкидлашича, бу жараёнлар тез орада бажарилиши учун барча саъй-ҳаракатлар амалга оширилади. 

Маълум қилинишича, Ўзбекистон чегараси йўналишида давлат чегарасини кесиб ўтиш учун Тожикистоннинг амалдаги хорижий паспорти бўлиши лозим.

Келишув кучга кирадиган сана ҳақида қўшимча тарзда маълум қилинади.

Шу билан бирга қабул қилинган кеишувга кўра, айни вақтда Тожикистоннинг чегараолди ҳудудлари аҳолиси Тожикистон паспорти билан Ўзбекистонга 5 кунлик муддатга ташриф буюриши мумкин. 

Бироқ паспорт ўрнига ID-карталарга эга бўлганлар чегарадан ўтказилмайдилар.

“ID-карталарда фуқаронинг яшаш жойи ҳақида маълумот бўлмайди ва шу сабабли у айнан чегараолди ҳудудида яшашини ҳеч нарса исботлай олмайди. Шу сабабли бу ҳужжат билан чегарадан ўтказиб бўлмайди”, дейилган хабарда.

Маълум қилинишича, 30 кунлик визасиз ташрифни кўзда тутувчи, Ўзбекистон ва Тожикистон ўртасидаги “Фуқароларнинг ўзаро ташрифлари тўғрисида”ги келишув кучга киргандан кейин икки давлатнинг қўшни давлатга ташриф буюрмоқчи бўлган барча фуқаролари мажбурий тартибда хорижий паспортларга эга бўлишлари керак бўлади.